لەسەر کۆکردنەوەی پارە بۆ مزگەوتێك دووبەرەكی لەنێوان كوردانی بەریتانیا دروست دەبێت

ئاڤا نیوز

لەسەر پارەخواردن بەناوی دروستكردنی مزگەوت و گۆڕینی مەلای مزگەوت، كێشە و دووبەرەكی لەنێو بەشێك لە كوردانی كۆڤەنتری لە بەریتانیا دروست دەبێت، تا دەگاتە ئاستی خۆپیشاندان.

چیرۆكی سەرەكی: بەشێك لە كوردانی كۆڤەنتری دەڵێن، ئەوان بەناوی دروستكردنی مزگەوتەوە، پارەیەكی زۆریان لەڕێگەی خێرخواز و خواپێداوان كۆكردووەتەوە، لەو هەڵمەتە جگە لە هاووڵاتیانی كورد، كەسانی پاكستانی و ئەفریقی و وڵاتانی عەرەبیش بەشداربوونە، بەگووتەی خۆیان یەك ملیۆن پاوەنیان كۆكردووەتەوە، بەڵام بەبێ ئاگاداركردنەوەی خەڵكەكە، بڕی 200 هەزار پاوەن لەو پارەیە بۆ كڕینی خانووێك بۆ مەلای مزگەوتەكە خەرج كراوە.

گرفتەكە چییە: كوردانی كۆڤەنتری ئاماژە بەوە دەكەن، "ئێمە پارەمان بۆ دروستكردنی مزگەوت كۆكردووەتەوە، نەك بۆ كڕینی خانوو بۆ بەرژەوەندیی كەسی"، بەهۆیەوە سەدان كەس دەستیان بە خۆپیشاندان كردووە و داوای لادانی مەلای مزگەوتی فیردەوس دەكەن.

لێدوانی فەرمی: هاووڵاتیێكی دانیشتووی شاری كۆڤەنتریە بە ئاڤای ڕاگەیاند، ئەوانەی خۆپیشاندان دەكەن داواكارییان ئەوەیە كە نایانەوێت نوێژ لەدوای مەلایەك بكەن كە بە پارەی خەڵكی خانووی بۆ كڕدرابێت.

چی ڕوویدا: دوای زیادبوونی گرژییەكان، پۆلیسی شارەكە هاتنە نێو خۆپیشاندەران و هەوڵیان داوە سروشتی كێشەكە بزانن، بەبیانووی ئەوەی بابەتەكە پەیوەندیی بە ئایین و كێشەی كۆمەڵایەتییەوە هەیە، پۆلیس ڕەتی كردووەتەوە بەدواداچوونی زیاتر بكات و پێی وتوون، "خۆتان كێشەكان چارەسەر بكەن."

بۆچوونی لایەنی بەرامبەر: ئاڤا پەیوەندیی بە كارگێڕیی مزگەوتی فیردەوس لە كۆڤەنتری كرد، تا لەزاری ئەوانیشەوە لە ڕاستی و دروستی بابەتەكە دڵنیا ببێتەوە، ئەوان ئاماژە بەوە دەكەن. "لە هەموو مزگەوتێك، هەر ئیمامێك كۆمەڵێك نەیاری هەیە، مەلا گۆڕین خۆپیشاندانی پێویست نییە و دەبێت بە ڕای زۆرینەی نوێژخوێنان بێ نەك كۆمەڵە كەسێك بە هاندان و بەرژەوەندیی چەند كەسایەتییەكی ئایینی، گێرەشێوێنی دروست بكەن.