شارێکی پیشەسازی لە هەڵەبجە دروست دەکرێت

ئاڤا نیوز

 به‌ فەرمانی سەرۆکوەزیران بارزانی، چەندین پڕۆژەی وەبەرھێنان لە پارێزگای ھەڵەبجە دەچنە بواری جێبەجێکردنەوە و شارەکە لەڕووی کەرتی وەبەرھێنانەوە دەچێتە قۆناغێکی دیکە. یەكێک لەو پڕۆژانە شاری پیشەسازیی هەڵەبجەیە و بە گوتەی یەكێتیی وەبەرهێنەرانی كوردستان"54 هەزار هەلی كار دەڕەخسێنێت".

 لێدوانی فەرمی: "یەکێک لەو پڕۆژانەی بڕیارە جێبەجێ بکرێت و کاریگەری لەسەر ئاوەدانی شارەکە دەبێت، پڕۆژەی شاری پیشەسازیی ھەڵەبجەیە و یەکێکە لە پڕۆژە ستراتیژییەکانی پارێزگاکە و کاریگەری خۆی دەبێت". یاسین مەحموود، گوتەبێژی یەکێتیی وەبەرھێنەرانی کوردستان بە ئاڤا نیوزی گوت. 

لەلایەکی دیکەوە: "سەرۆکوەزیران بارزانی، بە نووسراوی ژمارە 208، ڕەزامەندی لەسەر تەرخانکردنی 400 دۆنم زەوی دا، بۆ دروستکردنی شاری پیشەسازیی ھەڵەبجە، ئێستا سەرجەم ڕێکارەکان تەواو بووە، وەبەرهێنیش ئامادەیە بۆ دەستپێکردنی پڕۆژەکە و بڕیارە لە ئایندەیەکی نزیکدا دەست پێ بکات". بەرگەشت ئاکرەیی، گوتەبێژی دەستەی وەبەرهێنانی هەرێمی کوردستان بە ئاڤا نیوزی گوت.

بۆچی گرنگە؟ شاری پیشەسازیی ھەڵەبجە، 100 کارگەی پیشەسازی (گەورە، مامناوەند و بچووک) لەخۆ دەگرێت، 54 هەزار هەلی کار بەشێوەی ڕاستەوخۆ و ناڕاستەخۆ بۆ هاونیشتیمانیان دەڕەخسێنێت، بە تەواوبوونیشی، شارەکە لەڕووی کشتوکاڵی، پیشەسازی و بازرگانی دەبێتە یەکێک لە گرنگترین شارەکانی عێراق و ناوچەکە.