ئامێری تیشكیی مەمك بۆ نەخۆشخانەی بلێ دابین دەكرێت

ئاڤا نیوز

بۆ دەستنیشانكردنی پێشوەختەی نەخۆشی شێرپەنجەی مەمك لە دەڤەری مێرگەسۆر، ڕەزامەندی لەسەر ئامێری پێشكەوتووی تیشكی مەمك دەدرێت.

چیرۆکی سەرەکی: سەرۆكایەتی دیوانی ئەنجوومەنی وەزیرانی هەرێمی كوردستان، لەسەر داوای بەڕێوەبەرایەتی گشتیی تەندروستی سۆران، و لەپێناو باشتركردنی ئاستی خزمەتگوزاریی تەندروستی لەڕووی چەندایەتی و زانستی، ڕەزامەندی دا لەسەر دابینكردنی ئامێری تیشكی مەمك 'مەمۆگرام' بۆ نەخۆشخانەی فێركاری بلێ.

نووسراوی فەرمی: بەپێی نووسراوێكی سەرۆكایەتی دیوانی ئەنجوومەنی وەزیرانی هەرێمی كوردستان كە ئاڕاستەی وەزارەتی تەندروستی كراوە و وێنەیەكی لای ئاڤا میدیا پارێزراوە، ئامێری تیشكی مەمك بەگوژمەی 400 ملیۆن دینار بۆ نەخۆشخانەی فێركاریی بلێ دابین كراوە.

بۆچی گرنگە: دابینکردنی ئەم ئامێرە، کارئاسانی زۆر دەكات لە پشکنین و دەستنیشانکردنی پێشوەختەی نەخۆشی شێرپەنجەی مەمک لە ئافرەتان بۆ هاووڵاتیانی دەڤەری مێرگەسۆر و دەوروبەری، بەجۆرێك چیتر پێویست ناكات سەردانی نەخۆشخانەكانی سۆران و كەرتی تایبەت بكەن ئەنجامدانی ئەم پشكنینە.