ئەمریکا: چاوەڕێی کۆبوونەوەکانی داهاتووین لەگەڵ ئێران

ئاڤا نیوز

گەڕی چوارەمی دانووستانەکانی نێوان واشنتن و تاران بەدەرئەنجامی ئەرێنی کۆتایی هات و شاندی هەردوو وڵات لە داهاتوویەکی نزیکدا جارێکی دیکە کۆدەبنەوە

چیرۆکی سەرەکی: دوای وچانێک دوێنی یەکشەممە گەڕی چوارەمی دانووستانەکانی نێوان ئەمریکا و ئێران بەنێوەندگیری عومان لە مەسقەتی پایتەختی وڵاتەکە بەڕێوەچوو، ئەمەش چەند ڕۆژێک بەر لە هاتنی دۆناڵد ترەمپ، سەرۆکی ئەمریکا بۆ ڕۆژهەڵاتی ناوەڕاست.

زانیاریی بەدەستهاتوو: ئاکسیۆس لەزاری بەرپرسێکی ئەمریکییەوە ئاشکرای دەکات، گفتوگۆکان بە شێوەی ڕاستەوخۆ و ناڕاستەوخۆ بوون و زیاتر لە سێ کاتژمێری خایاندووە، دەرئەنجامەکانی کۆبوونەوەکە هانمان دەدات کە بەردەوام بین، چاوەڕوانی کۆبوونەوەی داهاتووین.

لەلایەکی دیکەوە: ئێران ئەم خوولەی دانووستانەکانی بە قورس و ئاڵۆز ناوبرد، بەڵام ئامادەیی بۆ بەردەوامدان بە گفتۆگۆکان دەربڕی.

ئەوەی پێویستە بیزانیت: هەردوولا پێش کۆبوونەوە بۆ جاری چوارەم ئاماژەیان بەقورسی دانووستانەکانی ئەمجارەیان کرد، لەلایەن ئەمریکاوە هۆشداری بە ئێران درا ئەگەر ئەمجارە دانووستانەکان بەرهەمدار نەبێت، ئەوا ئەمریکا بەردەوامی بە دانووستانەکان نادات.