وەزیرێکی کورد لەبارەی مووچە: کێشەی تەکنیکی هەیە و بەزووترین کات چارەسەر دەکرێت

ئاڤا نیوز

وەزیری دادی عێراق لەبارەی مووچەی مانگی چوار و گفتوگۆیان لە سوودانی ڕایدەگەیێنێت، کێشەی تەکنیکی هەیە، هەموو لایەک لەسەر هێڵن بۆ ئەوەی بەزووترین کات کێشەکە چارەسەر بکرێت.

وێنە گەورەکە: لەکاتێکدا 12 ڕۆژ بەسەر مانگی پێنجدا تێپەڕیوە کەچی هێشتا حکومەتی عێراق پارەی مووچەی مانگی چواری بۆ مووچەخۆرانی کوردستان نەناردووە، بە فەرمی و نافەرمیش ئاماژە بە هیچ هۆکارێک ناکات، ئەمە لەکاتێکدایە لە سەرەتای ئەم مانگەوە لە عێراق دەست بە دابەشکردنی مووچەی مانگی پێنج کراوە، 

لێدوانی فەرمی: خالید شوانی، وەزیری دادی حکومەتی عێراق کە کوردە، لەبارەی کێشەی مووچە و گفتوگۆکانیان لەگەڵ محەممەد شیاع سوودانی، سەرۆکوەزیرانی عێراق بە ئاڤا میدیای ڕاگەیاند: "کێشەکان بەرەو چارەسەر دەچن و لە ماوەیەکی کورتدا چاسەر دەکرێن. هەموو لایەک لەسەر هێڵین تا ئەو کێشە تەکنیکییەی هەیە چارەسەر بکرێت".

باکگراوند: ڕۆژی یەکشەممە 11-5-2025، لەدوای کۆبوونەوەی هەفتانەی ئەنجوومەنی وەزیرانی عێراق، سەرۆکوەزیران محەممەد شیاع سوودانی بەڵێنی بە وەزیرانی کورد دا  هەوڵ دەدەن ئەمڕۆ دووشەممە 12ی مانگ پارەی مووچە بنێرن، ئەمە بەپێی قسەی وەزیرێکی کورد کە بۆ ئاڤا قسەی کردبوو، بەڵام سەرەرای بەڵێنەکە ئەمڕۆش هیچ بڕە پارەیەک لە بەغداوە نەنێردرا.