هەناردەی نەوتی عێراق لە مانگی نیسان بۆ زیاتر لە سێ ملیۆن بەرمیل بەرزبووەتەوە

ئاڤا نیوز

بەپێی داتاکانی یەکەی توێژینەوەی وزە، هەناردەی عێراق لە نەوتی خاوی گواستراوە لە ڕێگەی دەریاوە لە مانگی نیسانی ڕابردوودا بۆ 3.30 ملیۆن بەرمیل لە ڕۆژێکدا بەرزبووەتەوە.

بڵاوکراوەی فەرمی: بەگوێرەی یەکەی توێژینەوەی وزە کە بارەگاکەی لە واشنتنە، هەناردەی عێراق لە نەوتی خاو لە مانگی ڕابردوودا بۆ 3.30 ملیۆن بەرمیل لە ڕۆژێکدا بەرز بووەتەوە بەراورد بە مانگی ئازاری ڕابردوو کە 3.27 ملیۆن بووە لە ڕۆژێکدا.

ژمارەکان وادەڵێن: بەراورد بە ساڵی ڕابردوو لە هەمان مانگدا، هەناردەی نەوتی عێراق لە ماوەی مانگی نیسان بە بڕی 212 هەزار بەرمیل لە ڕۆژێکدا دابەزیوە، لە کاتێکدا ساڵی ڕابردوو لە هەمان ماوەدا 3.51 ملیۆن بەرمیل بووە لە ڕۆژێکدا.

- بەگشتی، تێکڕای هەناردەی نەوتی خاوی عێراقی لە ماوەی چوار مانگی یەکەمی ئەمساڵ بەراورد بە هەمان ماوە لە ساڵی ڕابردوو بۆ 3.34 ملیۆن بەرمیل لە ڕۆژێکدا دابەزیوە، لە کاتێکدا هەناردەی نەوتی عێراق 3.42 ملیۆن بووە لە ڕۆژێکدا.

- هەناردەی نەوتی خاوی گواستراوە بە دەریا بۆ هەریەک لە سعوودیە، ئیمارات، کوێت، قەتەر و لیبیا لە ماوەی مانگی نیسان لەسەر بنەمای مانگانە پاشەکشەی تۆمار کردووە، لە کاتێکدا هەناردەی عێراق، جەزائیر و عومان بەرز بوونەتەوە.