پێشمەرگە و سوپای عێراق چیای قەرەچوغیان کێوماڵ کرد

ئاڤا نیوز

 

هێزەكانی پێشمەرگە و سوپای عێراق لە بناری چیای قەرەچوغ ئۆپەراسیۆنێكی هاوبەشیان ئەنجام دا.

 

وێنە گەورەكە: بەهۆی بوونی بۆشایی ئەمنییەوە زۆرجار شانە نووستوەکانی چەكدارانی داعش لەناوچە کێشە لەسەرەکانی دەرەوەی ئیدارەی هەرێمی كوردستان، جموجۆڵیان هەبووە، هەربۆیە هێزەکانی پێشمەرگە و سوپای عێراق چەندین جار ئۆپەراسیۆنی سەربازییان بۆ ئەو ناوچانەی گومانی مۆڵگە و حەشارگەی تیرۆرستانیان لێدەکرێت ئەنجام داوە. 

 

 

ڕاگەیێنراوی فەرمی: وەزارەتی پێشمەرگە لە ڕاگەیێنراوێكدا ئاشكرای كرد: بەمەبەستی دابینکردنی ئاسایش و سەقامگیری زیاتر لە ناوچەکەدا، ئەمڕۆ هێزەکانی پێشمەرگە و سوپای عێراقی ئۆپەراسیۆنێکی هاوبەشیان لە بناری چیای قەرەچوغ ئەنجام دا.

 

- وەزارەتی پێشمەرگە زانیاریی زیاتری سەبارەت بە ئۆپەراسیۆنەكە ئاشكرا كرد: 

- لە ئۆپەراسیۆنەکەدا، لیوای 14 و لیوای 18ی فیرقەی 1ی پیادەی وەزارەتی پێشمەرگە، فەوجی 1ی لیوای 3ی کۆماندۆی زێرەڤانی، لیوای 50 و 51ی فیرقەی 14ی سوپای عێراق بەشداربوون، تیایدا  دەشتایی و دۆڵ و ناوچەکانی باشوور و باکووری چیای قەرەچوغیان کێوماڵ کرد.

- ئامانج لەم ئۆپەراسیۆنانە کێوماڵکردن و پاککردنەوەی ناوچەکەیە لە مۆڵگە و حەشارگەکانی تیرۆریستانی داعش، بۆ ئەوەی ئاسایش و ئارامی ناوچەکە زیاتر سەقامگیر بێت.