دادگای کارگێڕیی عێراق بڕیارێکی ئەنجوومەنی پارێزگای دیالە ڕادەگرێت

ئاڤا نیوز

 

بۆ دووەمجار دادگای کارگێڕیی عێراق، بڕیاری ئەنجوومەنی پارێزگای دیالەی بۆ دوورخستنەوەی سەرۆکی ئەنجوومەنەکە ڕاگرت و عومەر کروی بۆسەر پۆستەکەی گەڕاندەوە.

 

وێنە گەورەکە: 29ی مانگی ڕابردوو ئەنجوومەنی پارێزگای دیالە لە کۆبوونەوەیەکدا دەنگیدا لەسەر وەرگرتنەوەی متمانە لە عومەر کروی، سەرۆکی ئەنجوومەنەکە و لە پۆستەکەی دووریی خستەوە.

ئەوەی پێویستە بیزانیت: کۆتایی ساڵی ڕابردوو و مانگی ئازاری ئەمساڵ دووجار ئەنجوومەنی پارێزگای دیالە بە زۆرینەی دەنگ بڕیاری دوورخستنەوەی عومەر کروی، سەرۆکی ئەنجوومەنەکەی دەرکرد، بەڵام دادگای کارگێڕی هەردووجارەکە بڕیاری دوورخستنەوەکەی ڕاگرت و جاری یەکەم بە فەرمی بۆسەر پۆستەکەی گەڕاندییەوە.

 

زانیاریی زیاتر: ئەمڕۆ دووشەممە (12ی ئایار) دادگای کارگێڕیی عێراق بڕیاریدا کارکردن بە نوێترین بڕیاری ئەنجوومەنی پارێزگای دیالە لە 23ی ئازاری ئەمساڵ ڕابگرێت، کە تیایدا عومەر کروی، سەرۆکی ئەنجوومەنەکە دووبارە لە پۆستەکەی دوورخرایەوە و کەسێکی دیکە لە شوێنی دانرا.

ئەمەش بزانە: دادگاکە بڕیاریشدا عومەر کروی بۆسەر پۆستەکەی بگەڕێنێتەوە تا ئەو کاتەی دادگای کارگێڕیی بڕیار لەبارەی یاساییبوونی لەکار دوورخستنەوەکەی دەردەکات.