بڕیارێک لەبارەی ئەو دایک و باوکانەی دوو منداڵی خاوەن پێداویستی تایبەتیان هەیە

ئاڤا نیوز

 

وەزارەتی کار و کاروباری هەرێمی کوردستان، نووسراوی پاڵپشتی ئەو دایک و باوکانە کە فەرمانبەرن دەکات کە منداڵی خاوەن پێداویستی تایبەتیان هەیە، بۆ ئەوەی مۆڵەت لە ئەرکەکەیان وەرگرن و ببنە خۆ تەرخانکەر.

 

وێنە گەورەکە: بەگوێرەی ماددەی 6ـی ژمارە 11ـی ساڵی 2024 هەموارکراو، هەر فەرمانبەرێک منداڵی خاوەن پێداویستی تایبەتی هەبێت، دەتوانێت مۆڵەتی ساڵانە بکات لە بری ئەرکەکەی چاودێری منداڵەکەی بکات، تایبەتمەندیش دراوە بەو دایک و باوکانەی کە زیاتر لە منداڵێکیان هەبێت.

 

لێدوانی فەرمی: یوسف چاوشین، بەڕێوەبەری گشتیی چاودێری و گەشەپێدانی کۆمەڵایەتیی هەولێر بە ئاڤای گوت، "تایبەتمەندی هەیە بۆ ئەو دایک و باوکانەی کە هەردووکیان فەرمانبەرن و دوو منداڵی ئۆتیزم یان  ئیفلیجیی مێشکیان هەیە، دەتوانن هەردووکیان مۆڵەت بکەن و ڕۆڵی خۆ تەرخانکەر ببینن، لە ڕێگەی نووسراوێک بەرزی دەکەنە، ڕەزامەندی دوای ڕاپۆرتی پزیشکی وەزارەتی تەندروستی دەدرێت."

 

ئەمەش بزانە: لە هەرێمی کوردستان، ساڵانە زیاتر لە دوو هەزار مۆڵەتی خۆتەرخانکەر نوێدەکرێتەوە، تەنیا لە هەولێر 800 مۆڵەتی خۆ تەرخانکەر بە فەرمانبەران دراوە بۆ چاودێری منداڵەکانیان.