دەست بە ڕێکارەکانی خەرجکردنی مووچەی مانگی چوار دەکرێت

ئاڤا نیوز

وەزارەتی دارایی عێراق نووسراوی خەرجکردنی پارەی مووچەی مانگی چواری مووچەخۆرانی هەرێمی کوردستانی دەرکرد، نووسراوەکە ئاراستەی بانکی ناوەندیی عێراقی کراوە بەمەبەستی دابینکردنی پارە و سبەی چوارشەممەش پارە دەنێردرێت.

چیرۆکی سەرەکی: دوای تێپەڕبوونی 45 ڕۆژ بەسەر دابەشکردنی مووچەی مانگی سێ، تەیف سامی، وەزیری دارایی عێراق ئەمڕۆ سێشەممە 13-5-2025 بڕیاری خەرجکردنی پارەی مووچەی مانگی چواری دا، هەر ئەمڕۆش دەست بە ڕێکارەکانی خەرجکردنی پارە دەکرێت.

لێدوانی فەرمی: سەرچاوەیەک لە ئەنجوومەنی وەزیرانی عێراق بە ئاڤای ڕاگەیاند، تەیف سامی واژۆی لەسەر خەرجکردنی پارەی مووچە کردووە، لە وەزارەتی داراییەوە نووسراوەکە ئاراستەی بانکی ناوەندیی کراوە، لەوێشەوە دەست بە ڕێکارەکانی خەرجکردنی پارە دەکرێت و ئیشعار بانکی دەردەکرێت.

زانیاریی تایبەت: ئاڤا زانیویەتی بڕی پارەکە زیاتر لە 950 ملیار دینارە، سبەی چوارشەممە دەخرێتە سەر هەژماری وەزارەتی دارایی و ئابووریی هەرێمی کوردستان لە لقی هەولێری بانکی ناوەندی، هەر سبەینێش خشتەی مووچە بڵاو دەکرێتەوە، ڕۆژی پێنجشەممەش دەست بە دابەشکردنی دەکرێت.


ئەمەش بزانە: سبەی چوارشەممە لەگەڵ گەیشتنی پارە دوای چەند کاتژمێرێک خشتەی مووچەی مانگی چوار لەلایەن وەزارەتی دارایی کوردستان بڵاودەکرێتەوە، ڕاستەوخۆش پارە بۆ بانکەکانی بەشدار لە هەژماری من دەنێردرێت، خشتەی مووچەش  هاوشێوەی خشتەی مووچەی مانگی سێ دەبێت و تەنیا چەند گۆڕانکارییەکی بچووکی تێدا دەکرێت.