ئاڤا وادەی بڵاوکردنەوەی خشتە و دابەشکردنی مووچە ئاشکرا دەکات

ئاڤا نیوز

دوای ڕەزامەندی تەیف سامی و دەرکردنی نووسراوی فەرمی لەلایەن وەزارەتی دارایی عێراق بۆ دابینکردنی پارە، ئاڤا زانیویەتی ئەمڕۆ پارە دەنێردرێت و خشتەی مووچە بڵاودەکرێتەوە، سبەی چوارشەممەش دەست بە دابەشکردنی دەکرێت.
 
چیرۆکی سەرەکی: دوای تێپەڕبوونی 45 ڕۆژ بەسەر دابەشکردنی مووچەی مانگی سێ، تەیف سامی، وەزیری دارایی عێراق ئەمڕۆ سێشەممە 13-5-2025 بڕیاری خەرجکردنی پارەی مووچەی مانگی چواری دا، هەر ئەمڕۆش دەست بە ڕێکارەکانی خەرجکردنی پارە کرا و لە وەزارەتی داراییەوە نووسراوی فەرمی ئاراستەی بانکی ناوەندیی عێراق کرا بەمەبەستی دابینکردنی پارە.

زانیاریی تایبەت: ئاڤا زانیویەتی بڕی پارەکە 959 ملیار دینارە، ئەمڕۆ سێشەممە دەخرێتە سەر هەژماری وەزارەتی دارایی و ئابووریی هەرێمی کوردستان لە لقی هەولێری بانکی ناوەندی.

٠ دوای چەند کاتژمێرێک لە گەیشتنی پارە، هەر ئەمڕۆ خشتەی مووچە بڵاو دەکرێتەوە، خشتەی مووچەش هاوشێوەی مانگی ڕابردوو دەبێت و تەنیا چەند گۆڕانکارییەکی بچووکی تێدا دەکرێت.

٠ ڕۆژی چوارشەممە 14ی مانگ دەست بە دابەشکردنی مووچە دەکرێت و  لە ماوەی سێ بۆ چوار ڕۆژدا سەرجەم مووچەخۆران مووچە وەردەگرن.

٠ هەر ئەمڕۆ پارە بۆ بانکەکانی بەشدار لە هەژماری من دەنێردرێت، ئەم مانگە زیاتر لە 400 هەزار مووچەخۆر لەڕێگەی هەژماری من مووچە وەردەگرن، تیمی هەژماری منیش هاوشێوەی وەزارەتی دارایی خشتەی دابەشکردنی مووچە بڵاو دەکاتەوە.

 ٠ دابەشکردنی مووچە لەرێگەی هەژماری منیشەوە چەند ڕۆژێک دەخایەنێت، بۆ ئەوەی قەرەباڵغی لەسەر ئەی تی ئێمەکان دروست نەبێت بۆیە بە یەک جار پارە ناخرێتە سەر هەژماری سەرجەم وەزارەتەکان.

ئەوەی پێویستە بیزانیت: سەرەڕای ڕێککەوتنی هەولێر و بەغدا لە سەرەتای ئەمساڵەوە لەبارەی مووچە، کە نابێت مووچە بە هیچ هۆکار و پاساوێک دوابکەوێت و پارەی هیچ مانگێک نەکەوێتە مانگی دواتر، بەڵام مانگی چوار حکومەتی عێراق بە ڕێککەوتنەکە پابەند نەبوو، دوای تێپەڕبوونی 45 ڕۆژ بەسەر دابەشکردنی مووچەی مانگی سێ ئینجا بڕیاری خەرجکردنی مووچەی مانگی چواری دا.