سەرۆککۆماری عێراق: پێشوازی لە بڕیاری چەکدادانان لەلایەن پەکەکەوە دەکەین

ئاڤا نیوز

د. عەبدوللەتیف ڕەشید، سەرۆککۆماری عێراق پێشوازی لە بڕیاری کۆنگرەی پارتی کرێکارانی کوردستان دەکات، وەک هەڵبژاردنی ڕێگای ئاشتیانە و دیموکراسی، بۆ کۆتاییهێنان بە ململانێی چەکداری.

وێنە گەورەکە: ڕۆژی دووشەممە 12-5-2025، لەسەر بانگەوازی عەبدوڵڵا ئۆجەلان، ڕێبەری زیندانیکراوی پەکەکە، ئەو ڕێکخراوە دەرئەنجامی کۆتا کۆنگرەی خۆی ئاشکراکرد و ڕایگەیاند، خۆیان هەڵدەوەشێننەوە و کۆتایی بە خەباتی چەکداریی دەهێنن.

ڕاگەیێنراوی فەرمی: بەگوێرەی ڕاگەیێنراوی نووسینگەی سەرۆکایەتیی کۆماری عێراق، "پێشوازی لەم بڕیارە دەکەین، وەک هەنگاوێکی باش بۆ چەسپاندنی ئاسایش و سەقامگیری لە ناوچەکە و کردنەوەی لاپەڕەیەکی نوێ بەرەو ئەنجامدانی دیالۆگێکی ڕاستەقینە و بوونیادنەر و دروستکردنی زەمینەیەکی لەبار بۆ گەیشتن بە ئاشتییەکی گشتگیر و هەمیشەیی کە کۆتایی بە دەیان ساڵ لە ململانێ و تراژیدیا و ئازارەکان بهێنێت و قۆناغێکی گرنگ لە کاری سیاسی و دیپلۆماسی و پەرلەمانی دەسپێبکات".

- "هەروەک پێشتر جەختمان کردەوە و جارێکی دیکەش جەخت دەکەینەوە کە تەنها ڕێگا بۆ چارەسەرکردنی کێشە و ناکۆکییەکان، دانیشتنە لەسەر مێزی دیالۆگ و لێکتێگەیشتن، بۆیە پشتگیری خۆمان بۆ هەموو هەوڵەکانی ئاشتی دووپات دەکەینەوە کە ئامانج لێی وەستاندنی خوێنڕشتن و پێکەوە ژیانە لە سایەی چەسپاندنی دیموکراسی و دڵنیاکردنی مافەکانی هەمووان و کارکردنی پێکەوە بۆ بەدیهێنانی خواستەکانی گەلانی ناوچەکە لە بوونیادنانی پەیوەندی ئەرێنی و پتەو لەسەر بنەمای ڕێزی یەکتر و بەرژەوەندییە هاوبەشەکان و پاراستنی سەروەری و بەهێزکردنی ئاسایش و سەقامگیری و گەشەسەندن بۆ گەلەکانمان".