وەزارەتی دارایی: بۆ مانگی پێنج زیاتر لە دوو هەزار خانەنشین داخڵی لیستی مووچە دەكرێن

ئاڤا نیوز

وەزارەتی دارایی هەرێمی كوردستان ئاشكرای دەكات كە لە مانگی شوباتی ئەمساڵەوە زیاتر لە 10 هەزار و 200 مامەڵەی خانەنشینان تەواو کراوە و بۆ مانگی پێنج زیاتر لە دوو هەزار خانەنشینی دیكە داخڵی لیستی مووچە دەكرێن و مووچەی پێنج مانگیان بۆ خەرج دەكرێت.

وێنە گەورەكە: ڕۆژی سێشەممە 13-5-2025، بەسەرپەرشتی ئاوات شێخ جەناب، وەزیری دارایی و ئابووری و ئامادەبوونی سەرجەم بەڕێوەبەرایەتییەکانی خانەنەنشین لە هەرێمی کوردستان کۆبوونەوەیەک لەسەر ڕاییکردنی مامەڵەی خانەنشینان بەڕێوەچوو.

ڕاگەیێنراوی فەرمی: بەپێی ڕاگەیێنراوێكی وەزارەتی دارایی، لە کۆبوونەوەکەدا وەزیری دارایی جەختی لەسەر چڕکردنەوەی هەوڵەکان بۆ هەرچی زوو تەواوکردنی دۆسیەی خانەنشینان کردەوە بە لەبەرچاوگرتنی ئەو ڕێکكارانەی پێشتر کە لەلایەن وەزارەتی داراییەوە گیراونەتەبەر کە خۆی لە دابەزاندنی دەسەڵاتەکان و کاراکردنی سیستەم و دابینکردنی فەرمانبەر و زیادکردنی دەوامی بەڕێوەبەرایەتییەکان دەبینیەوە.

- وەزیری دارایی داوای کرد پەلە بکرێت لە دەرکردنی ڕێنمایی بۆ جێبەجێکردنی یاسای خانەنشینی یەکگرتووی عێراق لەسەر سەرجەم ئاستەکان و گواستنەوەی دۆسیەی خانەنشینانی سەربازی لە وەزارەتی پێشمەرگەوە بۆ سەر وەزارەتی دارایی.

زانیاریی زیاتر: لە سەرەتای مانگی شوباتەوە تا ئێستا زیاتر لە 10 هەزار و 200 مامەڵەی خانەنشینان تەواو کراوە و بۆ مانگی ئایار زیاتر لە دوو هەزار خانەنشینی تر ناوەکانیان داخڵی لیستی مووچە دەکرێت و مووچەی پێنج مانگیان بۆ خەرج دەکرێتەوە، داواش لە وەزارەت و فەرمانگەکان دەکرێت بەزوویی دۆسیەی ئەو فەرمانبەرانە بنێرن کە بڕیاری خانەنشین بوونیان بۆ دەرچووە.