کەمکردنەوەی باجی گومرگی زیادە لە نێوان ئەمریکا و چین کەوتە بواری جێبەجێکردنەوە

ئاڤا نیوز

ڕێککەوتنی نێوان چین و ئەمریکا بۆ هەڵگرتنی هەندێک باجی زیادە کە لە نێوان هەردوو وڵاتدا سەپێندرابوو، ئەمڕۆ ڕۆژی چوارشەممە کەوتە بواری جێبەجێکردنەوە، ترەمپیش دەڵێت، ئابووری چین بە ڕووی بازرگانی ئەمریکا دەکرێتەوە.

وێنە گەورەکە: دوای چەندین ڕۆژ لە دانوستانی ئەمریکا و چین لە شاری جنێڤی سویسرا هەردوولا ڕێککەوتن باجی گومرگی زیادە لەسەر کاڵاکانی یەکتر هەڵبگرن، ئەمەش ئاگربەستێکە لە شەڕی بازرگانی نێوان واشنتۆن و پەکین کە کاریگەری نەرێنی لەسەر ئابووری جیهان دروستکردبوو.

ڕێککەوتنەکە بەم شێوەیەیە: ئەمریکا و چین ڕۆژی دووشەممە ڕێککەوتوون بۆ ماوەی 90 ڕۆژ ئەو باجە زیادەیەی بەسەر کاڵاکانی یەکتردا سەپاندنیان کەمبکەنەوە.

- بەپێی ڕێککەوتنەکە، ئەمریکا ڕەزامەندی دەربڕی لەسەر دابەزاندنی باجەکانی لەسەر کاڵا چینییەکان بۆ لەسەدا 30 لەکاتێکدا چین باجەکانی خۆی بۆ لەسەدا 10 کەمدەکاتەوە کە زیاتر لە 100% دابەزیوە.

لێدوانی فەرمی: دۆناڵد ترەمپ, سەرۆکی ئەمریکا ڕایگەیاند، ئێستا واشنتن نەخشەی ڕێککەوتنێکی بازرگانی زۆر زۆر بەهێزی لەگەڵ چین هەیە کە ئابووریی پەکین بەڕووی بازرگانی ئەمریکادا دەکاتەوە.
 
ئەوەی پێویستە بیزانیت: دوای چەند مانگێک لە سەپاندنی باجی زیادەی گومرگی لەلایەن دۆناڵد ترەمپ لەسەر کاڵاکانی چین بۆ وڵاتەکەی و لەبەرامبەردا چینیش بە زیادکردنی باجی گومرگی وەڵامی ترەمپی دایەوە، بەڵام ئێستا بەپێی ڕێککەوتنێکی نێوان ئەو دوو وڵاتە، ئەمریکا باجی گومرگییەکە لە 145% کەمدەکاتەوە بۆ 30%، هاوکات چینیش باجی گومرگی لە 125% بۆ 10% کەمدەکاتەوە.