52 هەزار مووچەخۆری نوێ لە ڕێگەی هەژماری من مووچە وەردەگرن

ئاڤا نیوز

 

ئەمڕۆ دەست بە دابەشکردنی مووچەی مانگی چوار دەکرێت، مووچەخۆرانی هەندێک وەزارەت بەهۆی هەژماری منەوە  پێش وادەی خۆی مووچە وەردەگرن. بۆ مووچەی مانگی چواریش 52 هەزار مووچەخۆر بەراورد بە مانگی سێ بۆ هەژماری من زیادکراون.

 

وێنە گەورەکە: وەزارەتی دارایی و ئابووری هەرێمی کوردستان، خشتەی دابەشکردنی مووچەی بڵاوکردووەتەوە، ئەوانەی کارتی هەژماری من ـیان چالاککراوە دەتوانن پێشوەختە مووچەکانیان وەرگرن، کە پێشتر لەڕێگەی کورتەنامەوە ئاگادار دەکرێنەوە.

 

زانیاریی تایبەت: تیمی هەژماری من بە ئاڤای گوت، "بۆ مووچەی مانگی چوار، 52 هەزار مووچەخۆر زیادکراون، ئەم مانگە 365 هەزار و 200 مووچەخۆر لە ڕێگەی ئامێرەکانی ATM دەتوانن پارەکانیان ڕابکێشن."

 

ئەمەش بزانە: هەژماری من لیستی مووچەی تایبەت بڵاودەکاتەوە بە سێ ڕۆژ سەرجەم وەزارەتەکان مووچە وەردەگرن. مووچەخۆرانی هەژماری من دەتوانن لە 580 ئامێری ڕاکێشانی پارە لە 200 شوێنی جیاواز مووچە وەربگرن.

 

ئەوەی پێویستە بیزانیت: تاوەکو ئێستا 735 هەزار مووچەخۆر لە هەژماری من تۆمارکراون، 419 هەزار کارتەکانیان وەرگرتووەتەوە، بەڵام هی هەموویان چالاک نەکراوە.