سبەی 21 وەزارەت و دەستە و دیوان و خانەنشینانی پێشمەرگە مووچە وەردەگرن

ئاڤا نیوز

بەگوێرەی خشتەی دابەشكردنی مووچەی مانگی چوار كە لەلایەن وەزارەتی دارایی و ئابووریی هەرێمی كوردستان بڵاوكرایەوە، سبەی 11 وەزارەت و 8 دەستە و دیوان مووچە وەردەگرن، هاوكات ئەنجوومەنی دادوەری و خانەنشینانی پێشمەرگەش لە خشتەی دابەشكردنی مووچەی سبەی ناویان هاتووە.

وێنە گەورەکە: ڕۆژی سێشەممە 2025-05-13، وەزارەتی دارایی عێراق بڕیاری ناردنی پارەی مووچەی مانگی چواری کوردستان دا و هەمان ڕۆژ وەزارەتی دارایی کوردستان خشتەی مووچەی بڵاوکردەوە، بەگوێرەی خشتەکە سبەی پێنجشەممە زیاد لە 11 وەزارەت و دەستە مووچەکانیان وەردەگرن.

لێدوانی فەرمی: سەرچاوەیەك لە تیمی هەژماری من تایبەت بە ئاڤا ڕایگەیاند، ئەو فەرمانبەرانەی بە كارتی هەژماری من مووچە وەردەگرن، سبەی پێنجشەممە 15ـی ئایار، مووچەكانیان دەچێتە سەر هەژمارەكانیان و مووچەخۆران دەتوانن لەڕێگەی ATMـەکانەوە مووچەكانیان وەربگرن.

زانیاریی زیاتر: بەگوێرەی خشتەكە؛ فەرمانبەرانی وەزارەتەكانی پەروەردە، خوێندنی باڵا و تەندروستی لەچوارچێوەی خشتەكەی سبەی پێنجشەممەدابوون، بەڵام مووچەكانیان پێشخرا و ئەمڕۆ چوارشەممە مووچەكانیان خرایە سەر هەژماریی بانكیان.