سەرۆكوەزیران بارزانی: خزمەتكردنی خەڵكی هەڵەبجە بە ئەركی خۆمان دەزانین

ئاڤا نیوز

 

لە ساڵیادی کیمیابارانکردنی شاری هەڵەبجەدا سەرۆکوەزیران بارزانی پەیامێکی بڵاوکردەوە و دەڵێت "حکومەتە یەک لەدوای یەکەکانی عێراق، تا ئێستا ئامادە نین، بە شێوەیەکی شایستە قەرەبووی کەسوکاری شەهیدانی هەڵەبجە بکەنەوە و خزمەتکردنی خەڵکی هەڵەبجە بە ئەرکی خۆمان دەزانین.

ڕاگەیێنراوی فەرمی: "لە 36مین ساڵیادی کیمیارانکردن و کۆمەڵکوژیی شاری هەڵەبجەدا، بەڕێز و شکۆوە یادی شەهیدانی بێتاوانی ئەو شارە خۆشەویستەی کوردستان دەکەینەوە کە بوونە قوربانی دڕەندەیی ڕژێمی پێشووی عێراق و بێدەنگی کۆمەڵگەی نێودەوڵەتی".

زانیاريی زیاتر: سەرۆکوەزیران بارزانی ئەمانەشی گوتووە؛

- ئامانجی سەرەکی ئەم تاوانە و تاوانەکانی دیکەی ڕژێمە یەک لە دوای یەکەکانی عێراق لە دژی خەڵکی کوردستان، جینۆسایدکردنی گەلی کوردستان و سڕینەوەی ناسنامەکەی بوو.

- پێویستە هەمیشە ئەم تاوانانەمان لە یاد بێت و هاندەرمان بێت بۆ داکۆکیکردن لە مافە نەتەوەیی و نیشتمانییەکانمان و پاراستنی قەوارەی هەرێمی کوردستان. 

- لە دوای ڕووخانی ڕژێمی پێشوو، حکومەتە یەک لەدوای یەکەکانی عێراق، تا ئێستا ئامادە نین، قەرەبووی کەسوکاری شەهیدانی هەڵەبجە و قوربانییانی شاڵاوەکانی ئەنفال و تاوانەکانی دیکە بکەنەوە، تەنانەت تا ئێستا ئامادە نین ڕێکارەکانی بەپارێزگابوونی هەڵەبجەش تەواو بکەن.

- خزمەتکردنی خەڵکی هەڵەبجە بە ئەرکی خۆمان دەزانین.

- مانگی ڕابردوو لە کاتی سەردانمان بۆ پارێزگای هەڵەبجە، ڕەزامەندیمان لەسەر هەموو ئەو داواکارییانە دا کە لەلایەن پارێزگار و بەرپرسانی کارگێڕی دەڤەرەکە خرانەڕوو.

- شەهیدانی کارەساتی هەڵەبجە و هەموو ئەو جینۆسایدانەی بەرامبەر خەڵکی کوردستان ئەنجامدراون، هەمیشە لە یادمانن و هەرگیز نابێت ڕێگە بدەین هیچ شتێک لەبیر خۆمان و دەوڵەتی عێراق بباتەوە، پێویستە قەرەبووی خەڵکی کوردستان بکەنەوە.