فایلی خەڵک؛ دانیشتوانی 10 گوندی سنووری هەریر کێشەی کەمیی خزمەتگوزارییان هەیە

ئاڤا نیوز

ژمارەیەک گوندی سنووری دەشتی هەریر، کێشەی کەمی خزمەتگوزارییان هەیە. وەکو ئاو و کارەبا و ڕێگاوبان. قایمقامیش بەڵێنی چارەسەریان پێدەدات.

چیرۆکی سەرەکی: 10 گوندی سنووری هەریر بەدەست نەبوونی خزمەتگوزارییەوە دەناڵێنن بەتایبەت ڕێگاوبان، بەپێی بەدواداچوونەکانی پەیامنێری ئاڤاش کۆمپانیایەکی نەوت لە ساڵی 2016 لەو ناوچەیە کاری کردووە، ڕێگەی ئەو 10 گوندەی تێکداوە و چاکیشی نەکردووەتەوە.

لێدوانی فەرمی: دانیشتوانی گوندەکان بە ئاڤایان وت، هەندێکمان تەنیا بە شەوان کارەبامان هەیە، مۆلیدەی ئەهلیشمان نییە.

بۆچوونی لایەنی بەرامبەر: شێروان جەلال، قایمقامی هەریر بە ئاڤای ڕاگەیاند:

٠ دەرخستەمان بۆ ڕێگای ئەو 10 گوندە کردووە و ئامادەیە لە داهاتوودا دەست بە  چاککردنی دەکرێت.

٠ بۆ کێشەی کەمی کارەباش، پەیوەندی بە خشتەی دابەشکرنی کارەباوە هەیە و لەبەر دەستی ئێمە دانیە.

٠ بۆ کێشەی کەمئاویش دەتوانن سەردانمان بکەن و ئێمە لیژنەیەکمان هەیە بۆ بەرەنگاربوونەوەی وشکەساڵی  و دەتوانین لە ڕێگای تەنکەرەوە ئاویان بۆ دابین بکەین، تا کاری لێدانی بیر و ڕاکێشانی تۆڕی ئاوی خواردنەوەیان بۆ جێبەجێ دەکرێت.