لە نەجەف کارەساتێکی ژینگەیی بەڕێوەیە

ئاڤا نیوز

لەپارێزگای نەجەف کارەساتێکی ژینگەیی بەڕێوەیە ئەگەر تا هاوینی ئەمساڵ چارەسەر نەکرێت ئەوا ڕەنگە ببێتە هۆی سەرهەڵدان و بڵاوبوونەوەی چەندین نەخۆشی کە لەئاژەڵەوە بۆ مرۆڤ دەگوازرێتەوە.

چیرۆکی سەرەکی: ڕۆژانە شوانکارانی ناوچەی ئوم خەشم لە پارێزگای نەجەف زیاتر لە  25 هەزار سەر گامێش لەدەوروبەری ئاوی فوڕات نزیک لەهەردوو قەزای میشخاب و قادسییە دەڵەوەڕێنن لەکاتێکدا خەڵکی ئەو ناوچانە بۆ دابینکردنی پێداویستیەکانیان لەئاو پشت بە ئاوی ئەو ڕووبارە دەبەستن کە بەهۆی وشکە ساڵییەوە تادێت بۆ نزمترین ئاست دادەبەزێ.

لێدوانی فەرمی: حەیدەر فلەییح، بەڕێوەبەری بەشی گۆڕانی کەشوهەوا لە بەڕێوەبەرایەتی ژینگەی نەجەف ڕایگەیاند:  لەگەڵ دابەزینی ئاستی ڕووباری فورات، بوونی ئەم ژمارە زۆرەی گامێش کارەساتێکی ژینگەیی لێدەکەوێتەوە، بەتایبەتی لەگەڵ مرداربوونەوەی زۆری ئاژەڵان و کەڵەکەبوونی پاشماوەکانیان.

زانیاریی زیاتر: فلەییح ئاماژەی بەوەشکرد، پێشنیازێکی فەرمیمان بۆ گواستنەوەی شوێنی لەوەڕینی ئەو گامێشانە بۆ ناوچەیەکی ئاویی و گونجاو لەگەڵ سروشتی ئەو ئاژەڵانە بگونجێت کردووە، بەڵام بەداخەوە تا ئێستا ئەو پێشنیازە جێبەجێ نەکراوە.

لەلایەکی دیکەوە: بەپێی گوتەی خەڵکی ئەو ناوچانە، ئاوی ڕووبارەکە خۆی پڕە لە پاشماوەی پیسی ڕۆژانەش ئەو هەموو گامێشە تەپاڵە و پیسی لەڕووبارەکەدا بڵاودەکەنەوە و خەڵکیش بەکاری دەهێنێت، ئەمەش بەدڵنیاییەوە کارەساتی لێدەکەوێتەوە.