سەدان دۆنم گەنمی هاووڵاتییان لە پارێزگای سەڵاحەدین سووتا

ئاڤا نیوز

چەند ڕۆژێک پێش دەستپێکردنی وەرزی دروێنەکردن، لە پێنج ڕووداوی ئاگرکەوتنەوەدا، لە سنووری پارێزگای سەڵاحەدین، سەدان دۆنم گەنمی هاووڵاتییان سووتا و زیانێکی زۆری بەجووتیاران گەیاند.

بۆچی گرنگە: پارێزگای سەڵاحەدین بە یەکێک لە گرنگترین و دەوڵەمەنترین ناوچەی کشتوکاڵی عێراق دادەنرێت، ڕووبەرێکی فراوانی زەوی بەپیت لەخۆدەگرێت کە بە پلەی یەکەم جووتیارانی  پشت بە چاندنی گەنم و جۆ دەبەستن و سەرچاوەیەکی سەرەکی بژێوی ژیانیان پێکدەهێنێت.

زانیاری بەدەستهاتوو: سەرچاوەیەک لەپارێزگای سەلاحەدین ئاشکرایکرد: بەرەبەیانی ڕۆژی 2025-05-14 ئاگرێکی گەورە لە کێڵگەکانی گەنم لە گوندی نەعیماتی نزیک شاری تکریت کەوتەوە، بەهۆیەوە سەدان دۆنم گەنمی هاووڵاتییان سووتان و بە سێ تیمی بەرگری شارستانی ئاگرەکەکە کۆنتڕۆڵکرا .

لەلایەکی دیکەوە: بەپێی پۆلیسی شارەکە، چەند ڕۆژێکە، ئاگر لە پوش و پاوان و گەنمی هاووڵاتییانی چەند ناوچەیەکی پارێزگای سەلاحەدین بەربووەتەوە و تائێستا هۆکاری ئاگرکەوتنەوەکە نەزانراوە، بەپێی بەرگری شارستانی پارێزگاکە زۆربەی ئەو ئاگرانە بەهۆی شۆرتی کارەباوە بووە و بەدواداچوونیش بەردەوامە.