بەرهەمە شیرەمەنییەکان شەکری خوێن ڕێکدەخەن

ئاڤا نیوز

 

توێژینەوەیەکی نوێی زانستی سوودە تەندروستییەکانی خواردنی بەرهەمە شیرەمەنییەکان لەسەر تەندروستی مرۆڤ ئاشکرا دەکات، کە کاریگەری هەیە لەسەر ڕێکخستنی ئاستی شەکر لە خوێندا.

 

زانیاریی بەدەستهاتوو: زانایانی هیندستان و بەریتانیا توێژینەوەیەکی زانستییان بۆ زانینی خۆراکی یارمەتیدەر بۆ ڕێکخستنی ئاستی شەکر لە خوێندا لەسەر 30 کەسی پێگەشتوو ئەنجامداوە و دەرکەوتووە، ئەو کەسانەی بەرهەمە شیرەمەنییەکانیان خواردووە ئاستی شەکری خوێنیان کەمتر و جێگیرتر بووە.

 

لەلایەکی دیکەوە: توێژەران ئەوەشیان ئاشکرا کرد، ئەو بەکتریایانەی لە بەرهەمە شیرەمەنییەکاندا هەن بەرگری جەستە بەرز دەکەنەوە، هەروەها بەرپرسن لە چالاکییەکانی جوڵەی ڕیخۆڵە، وازهێنان لە خواردنی بەرهەمە شیرەمەنییەکان بە تەواوی میتابۆلیزم خاو دەکاتەوە، ئەمەش دەبێتە هۆی زیادبوونی کێش.

 

- هەروەها دەرکەوتووە ئەو کەسانەی کە رۆژانە بڕێکی گونجاوی بەرهەمە شیرەمەنییەکان دەخۆن، تەندروستی پێستیان باشترە و گەنجتر دەردەکەون.

 

ئەوەی پێویستە بیزانیت: شارەزایان ئاماژەشیان بەوە کردووە کە ئەم دۆزینەوانە دەرگا بۆ لێکۆڵینەوەی زیاتر لەسەر کاریگەریی خۆراکە جیاوازەکان لەسەر کرداری هەرسکردن و کۆنترۆڵکردنی شەکری خوێن و دۆزینەوەی چارەسەری نوێ و کاریگەر بۆ نەخۆشی شەکرە دەکاتەوە.