ئاڤا هۆکاری کشانەوەی شاندی ئیمارات لە لووتکەی بەغدا ئاشکرا دەکات

ئاڤا نیوز

بەهۆی ناکۆکییان لەگەڵ سوودان، شاندی وڵاتی ئیمارات، هەر زوو لە لووتکەی عەرەبی لە بەغدا کشایەوە و گەڕایەوە وڵاتەکەی.

وێنە گەورەکە: ئیمارات و سوودان ناکۆکییەکی قووڵیان هەیە و پەیوەندیی دیپلۆماسیی نێوانیان پچڕاندووە، سوودان ئەو وڵاتەی تۆمەتبار کردووە بە پشتیوانیکردنی "هێزەکانی بەرپەرچدانەوەی خێرا" کە محەممەد حەمدان سەرۆکایەتیی دەکات و لە ئێستادا شەڕ لە نێوان سووپا و ئەو هێزە بەرپا بووە.

لێدوانی فەرمی: سەرچاوەیەک لە حکومەتی عێراق بە ئاڤا میدیای ڕاگەیاند: شاندی ئیمارات بەسەرۆکایەتی مەنسوور بن زائید، جێگری سەرۆکی ئیمارات، کە بەشداری لە لووتکەی عەرەبی لە بەغدا کردبوو، بێ ئەوەی وتارەکەی پێشکەش بکات لە لووتکەکە کشایەوە.

هۆکارە زانراوەکان: بەگوێرەی ئەو سەرچاوەیە، شاندی ئیمارات بەهۆی ناکۆکی لەبارەی مەلەفی سوودانەوە کشاوەتەوە.

زانیاریی زیاتر: ئیبراهیم جابر، جێگری سەرۆکی ئەنجوومەنی سەرەوەریی سوودان، نوێنەرایەتیی ئەو وڵاتەی لە لووتکەکەدا دەکرد.

لەلایەکی دیکەوە: شێخ تەمیم بن حەمەد ئال سانی، میری قەتەر بۆ بەشدایکردن لە لووتکەکە سەردانی بەغدای کردبوو، بەڵام بەشداریی لووتکەکەی نەکرد و گوتاری وڵاتەکەی پێشکەش نەکرد، تەنیا لە گرتنی وێنە یادگارییەکە بەشداربوو، هاوکات کۆبوونەوەیەکی کورتی لەگەڵ سەرۆکوەزیرانی عێراق کرد.