ڕووسیا: ئەمریکا ڕۆڵی ئەرێنییە لە دانوستانەکانمان لەگەڵ ئۆکراینا

ئاڤا نیوز

سێرگی لاڤرۆڤ، وەزیری دەرەوەی ڕووسیا سەبارەت بە دانوستانە ڕاستەوخۆکانی ڕووسیا و ئۆکراینا لە ئیستەنبووڵ، پەیوەندییەکی تەلەفۆنی لەگەڵ مارکۆ ڕوبیۆ وەزیری، دەرەوەی ئەمریکا ئەنجامدا. گفتوگۆیان لەبارەی ڕۆڵی ئەمریکا لە دانوستانەکانی ڕووسیا و ئۆکراینا کردووە.

وێنە گەورەکە: دوای هەفتەیەک لە ململانێی تووند، کیێف و مۆسکۆ ڕۆژی هەینی، 2025-05-16، لە شاری ئیستەنبووڵ یەکەم دانوستانی ڕاستەوخۆیان لەسەر ئاگربەست کرد.

ڕاگەیێنراوی فەرمی: وەزارەتی دەرەوەی ڕووسیا ڕایگەیاند، لە پەیوەندییە تەلەفۆنییەکەدا لاڤرۆڤ ئاماژەی بە ڕۆڵی ئەرێنی ئەمریکا کردووە لە هاوکاریکردنی ئۆکراینا لە قبووڵکردنی پێشنیازی ڤلادیمێر پووتین، سەرۆکی ڕووسیا بۆ دانوستانەکانیان لە ئیستەنبووڵ. لاڤرۆڤ  ئاماژەی بەوەشکرد، وڵاتەکەی ئامادەیە بەردەوامی بە کارەکانیان لەگەڵ واشنتن لەو بارەیەوە بدەن.

لەلایەکی دیکەوە: وەزارەتی دەرەوەی ئەمریکا بڵاویکردەوە، لە پەیوەندییە تەلەفۆنییەکەدا مارکۆ ڕوبیۆ، وەزیری دەرەوەی ئەمریکا پێشوازی لەو ڕێککەوتنە کرد کە لە میانی دانوستانەکانی ڕووسیا و ئۆکراینا لە ئیستەنبووڵ هاتوونەتە ئاراوە و ڕایگەیاند، ئەمریکا پابەندە بە کۆتاییهێنان بە شەڕی ڕووسیا و ئۆکراینا،  ترەمپ داوادەکات دەستبەجێ ئاگربەست بکرێت و کۆتایی بە تووندوتیژییەکان بهێنرێت.

ئەوەی پێویستە بیزانیت: لە دانوستانەکانی ئیستەنبووڵ شاندی ئۆکراینا داوایان لە ڕووسیا کرد، بە ئاگربەستی بێ مەرج ڕازی ببن و لەسەر ئاستی باڵا ڤۆلۆدیمێر زێلنسکی، سەرۆکی ئۆکراینا و ڤلادیمێر پووتین، سەرۆکی ڕووسیا کۆببنەوە.

ئەمەش بزانە: کۆشکی کرێملین ڕایگەیاندووە، دوای ئازادکردنی دیلەکان دەکرێت دانوستانەکانیان لەگەڵ ئۆکراینا بەردەوام بێت.