لە هەولێر حەوتەمین کۆنفرانسی نێودەوڵەتیی نەخۆشییەکانی منداڵان بەڕێوەدەچێت

ئاڤا نیوز

ژمارەیەك پزیشكی نێودەوڵەتیی پسپۆڕ لە نەخۆشییەكانی منداڵان، ئەزموونی كاری پزیشكی و توێژینەوە زانستییەكانی خۆیان لەبارەی چارەسەری منداڵان لەگەڵ پسپۆڕانی هەرێمی كوردستان بەش دەكەن.

چیرۆكی سەرەكی: لە شاری هەولێر، حەوتەمین کۆنفرانسی نێودەوڵەتیی نەخۆشییەکانی منداڵان بەڕێوەچوو كە ژمارەیەكی زۆر لە پسپۆڕانی نەخۆشییەكانی منداڵان لە هەرێمی كوردستان و عێراق و دەرەوەی وڵات تێیدا بەشداربوون، هاوكات هەریەك لە وەزیری تەندروستیی هەرێمی كوردستان و بەڕێوەبەری گشتیی تەندروستیی هەولێر و سەرۆكی كۆمەڵەی پزیشكانی منداڵان و ژمارەیەك بەرپرسی دیكەی حكومی، ئامادە بوون.

ڕاگەیێنراوی فەرمی: بەپێی ڕاگەیێنراوی فەرمی وەزارەتی تەندروستیی حكومەتی هەرێمی كوردستان، بە درێژایی دوو ڕۆژی كۆنفرانسەكە، ڕەوشی پزیشكیی منداڵان لە هەرێمی كوردستان تاوتوێ كرا، هاوكات ژمارەیەك پانێڵ سازكران كە تێیدا ژمارەیەك توێژینەوەی زانستیی ئاستی جیهانی تایبەت بە چارەسەری منداڵان خرانەڕوو.