سەرۆک بارزانی: گۆڕانکارییەکانی نێو پارتی لێپێچینەوە نییه‌ لە كه‌س بەڵکو لە بەرژەوەندی حیزبە

ئاڤا نیوز

به‌رپرسی لقی یازدەی ڕاپه‌ڕینی پارتی دیموكراتی كوردستان تایبەت بە ئاڤا دەڵێت، له‌ خزمه‌ت سه‌رۆك بارزانی بووین و ڕێنمایی پێداین به ‌شێوه‌یه‌كی باشتر خزمه‌تی خه‌ڵكی بكه‌ین. باسی لەوەشكرد ئاڵوگۆڕ و گۆڕانكارییەكانی ناو پارتی لە بەرژەوەندیی خەڵك و پارتی و قۆناغەكەدایە.

وێنە گەورەكە: دوای ئاڵوگۆڕی ژمارەیەك بەرپرسی لقەكانی پارتی دیموكراتی كوردستان، سەرۆك بارزانی لە سەڵاحەددین لەگەڵ بەرپرسانی نوێی لقەكان دیدارێكی ئەنجامدا و ڕێنمایی پێدان كە ئامانجی یەكەمی پارتی لە هەموو هەنگاوێكیدا، خزمەتكردنی خەڵكە.

لێدوانی فەرمی: كرمانج عززه‌ت، به‌رپرسی لقی 11ـی راپه‌ڕینی پارتی، به ئاڤای ڕاگه‌یاند، ئه‌و بڕیارانه‌ی پارتی بۆ ئاڵوگۆڕ و گۆڕانكاری داویەتی، پێشتر دیراسه‌ كراون، چونكه‌ پارتی هه‌میشه‌ ده‌یه‌وێ خۆی له‌گه‌ڵ قۆناغه‌كاندا بگونجێنێ و ئاڵوگۆڕ و گۆڕانكاریش له‌ناو پارتیدا پرۆسه‌یه‌كی ئاساییه‌ و هه‌ر هه‌بووه‌، ئێستاش به‌رژه‌وه‌ندیی پارتی و قۆناغه‌كه‌ش وای خواستووه‌ ئه‌و گۆڕانكارییه‌ به‌و شێوه‌یه‌ بكرێت، پێشوازی له‌ بڕیاره‌كانی حزب ده‌كه‌ین و له‌ به‌رژه‌وه‌ندیی خه‌ڵك و قۆناغه‌كەدا‌یه‌.

"سه‌رۆك بارزانی رێنوێنیی كردین تا پێمان بكرێت خزمه‌تی هاووڵاتیانی هه‌رێمی كوردستان و ئه‌و ناوچانه‌ی لێی به‌رپرسین بكه‌ین، به ‌شێوه‌یه‌كی باشتر بتوانین بچینه‌ ناو خه‌ڵك و ئه‌وانه‌شی له‌ پۆسته‌كانیان نه‌ماون، سەرۆك بارزانی فه‌رمووی، هه‌ر كادیری پارتین و جێگه‌یان ده‌كرێته‌وه‌."

زانیاریی زیاتر: به‌رپرسی لقی 11ـی ڕاپه‌ڕین ئاماژەی بەوەشكرد، سه‌رۆك بارزانی پێی ڕاگەیاندنی، ئه‌و ئاڵوگۆڕه‌ په‌یوه‌ندی به ‌هیچ شه‌خسێكه‌وه‌ نه‌بووه‌، هه‌روه‌ها محاسەبه‌ی كه‌س نییه‌، به‌ڵكوو به‌رژه‌وه‌ندیی حیزبه‌.