کۆمیسیۆن یاسایەکی نوێ بەسەر کاندیدانی سەربەخۆ جێبەجێ دەکات

ئاڤا نیوز

کۆمیسیۆنی هەڵبژاردنەکانی عێراق، سەبارەت بەو کەسانەی دەیانەوێ بە شێوەی سەربەخۆ، خۆیان بۆ خولی شەشەمی پەرلەمانی عێراق کاندید بکەن کار بە ڕێنماییەکی نوێ دەکات، دەبێت واژۆ و ناوی 500 دەنگدەر لەگەڵ خۆیان ببەن.

چیرۆکی سەرەکی: ڕۆژی 2025-05-25، پڕۆسەی پێشکەشکردنی ناوی کاندیدان لەلایەن لیست و کاندیدە سەربەخۆکان دەست پێدەکات، تاوەکو 2025-06-24 بەردەوام دەبێت، بۆ ئەم خولەی هەڵبژاردن بۆ یەکەمینجار کار بەیاسای ژمارە 4ـی ساڵی2023 دەکرێت.

لێدوانی فەرمی: خالید عەباس، بەرپرسی ئۆفیسی دھۆکی کۆمسیۆنی باڵای سەربەخۆی ھەڵبژاردنەکانی عێراق بە ئاڤای گوت، "بەگوێرەی ڕێنمایی نوێ پێویستە 500 کەس کە تۆماری بایۆمەتریان هەبێت واژۆی بۆ بکەن، ئینجا دەتوانێت فۆڕمی خۆ کاندیدکردن پڕبکاتەوە."

ئەمەش بزانە: بەگوێرەی یاساکە پێویستە کاندید، تەمەنی سەرووی 30 ساڵ بێت، بڕوانامەی بەکالۆریۆسی هەبێت و عێراقی بێت، لە ڕووی دەستەی دەستپاکییەوە کێشەی نەبێت، هەمان ئەو ڕێنماییانە کاندیدی حیزب و هاوپەیمانێتییەکانیش دەگرێتەوە، بەڵام ڕێژەی 20%ـی کاندیدانیان ئاساییە بڕوانامەی دیبلۆم یان ئامادەییان هەبێت.