عێراق یەک ملیار دۆلار بۆ لووتکەی عەرەبی خەرج دەکات چوار ملیۆن دیناری بۆ ئاوارەکان نییە

ئاڤا نیوز

پڕۆسەی گەڕانەوەی ئاوارەکانی شنگال بەهۆی ڕاگرتنی هاوکاری دارایی عێراق وەستاوە، زیاتر لە 55 هەزار خێزان لە ناوەوە و دەرەوەی کەمپەکانی سنووری پارێزگای دهۆک ماونەتەوە، ئێستا تەنیا ڕێکخراوەکان هاوکاری دارایی پێشکەش بە ئاوارەکان دەکەن.

وێنە گەورەکە: حکومەتی عێراق لە بەرامبەر گەڕانەوەی هەر خێزانێک بۆ ناوچەکانیان، بڕی چوار ملیۆن دیناری وەک هاوکاری دەدات، بەبیانووی نەبوونی سویلە، پارەکە ڕاگیراوە و پڕۆسەی گەڕانەوەی ئاوەرەکانیش وەستاوە، لە بەرامبەردا بۆ 34ـەمین لووتکەی عەرەبی کە لە بەغدا بەڕێوەچوو یەک ملیار دۆلار خەرجکراوە.

لێدوانی فەرمی: پیر دیان جەعفەر، بەڕێوەبەری کۆچ و کۆچبەران لە پارێزگای دهۆک بە ئاڤای گوت، "20 هەزار و 814 خێزان لە 15 کەمپی سنووری دهۆک و زاخۆ، و 35 هەزار خێزانی دیکە لە دەرەوەی کەمپەکانی ئەو سنوورە ماونەتەوە و چارەنووسی گەڕانەوەیان نادیارە."

ئەمەش بزانە: تاوەکو ئێستا 10 هەزار خێزانی ئاوارەی شنگال گەڕاونەتەوە ناوچەکانیان، لەگەڵ دەستپێکردنەوەی پێدانی هاوکارییەکەش پڕۆسەی گەڕانەوەیان کارا دەبێتەوە.