کۆمیسیۆن ماوەی تۆماری بایۆمەتری دەنگدەران بۆ سێ هەفتە درێژدەکاتەوە

ئاڤا نیوز

کۆمیسیۆنی باڵای سەربەخۆی هەڵبژاردنەکانی عێراق بڕیاریدا، ماوەی تۆماری بایۆمەتری دەنگدەران تا 15ی حوزەیران درێژبکاتەوە.

 

ئەوەی پێویستە بیزانیت: تۆماری بایۆمەتری و نوێکردنەوەی تۆماری دەنگدەران بە سەرەکیترین قۆناغی هەر هەڵبژاردنێک دادەنرێت و چەندین مانگی پێویستە، بڕیاربوو 24ی ئەم مانگە واتە پێنج ڕۆژی دیکە پرۆسەکە کۆتایی بێت.

 

ڕاگەیێنراوی فەرمی: ئەنجوومەنی کۆمیسیارانی کۆمیسیۆنی باڵای سەربەخۆی هەڵبژاردنەکانی عێراق لە کۆبوونەوەی ئەمڕۆیدا بڕیاریدا ماوەی تۆماری بایۆمەتری تا 15ی حوزەیران درێژبکرێتەوە، تا زۆرترین دەرفەت بە هاووڵاتیان بدرێت و بتوانن بە نوێکردنەوەی کارتی دەنگدان مافی بەشداریکردن لە هەڵبژاردن بەدەستبهێنن.

 

لەلایەکی دیکەوە: دوای ئەوەی بۆ جاری سێیەم ماوەکەی درێژ کردەوە، کۆمیسیۆنی باڵای سەربەخۆی هەڵبژاردنەکانی عێراق بە ئاڤا میدیای ڕاگەیاند، کۆتایی ڕۆژی پێنجشەممە دوایین وادەیە بۆ تۆمارکردنی هاوپەیمانێتی و حیزبەکان بۆ بەشداریکردن لە هەڵبژاردنی پەرلەمانی عێراق و دوای ئەو ماوەیە چیتر درێژناکرێتەوە.