حەلبووسی: پۆستی سەرۆککۆمار یاخود پۆستی سەرۆکی پەرلەمان وەردەگرم

ئاڤا نیوز

 

محەممەد حەلبووسی، سەرۆکی پێشووی پەرلەمانی عێراق ڕایدەگەیێنێت، لە هەڵبژاردنی داهاتووی پەرلەمانی عێراق کورسییەکانی حیزبەکەی زیاد دەکات و باسیش لەوە دەکات کە پۆستی سەرۆککۆمار یاخود سەرۆکی پەرلەمان وەردەگرێت. 

 

 

وێنە گەورەکە: ڕۆژی 14ـی تشرینى دووەمی 2023، دادگەى باڵاى فیدراڵیی عێراق لەسەر سکاڵایەکى لەیس دلێمى، ئەندامێتیى محەممەد حەلبووسی سەرۆکی پەرلەمانى عێراقی هەڵوەشاندەوە. 

 

لێدوانی فەرمی: محەممەد حەلبووسی، سەرۆکی پێشووتری پەرلەمانی عێراق و سەرۆکی حیزبی تەقەدووم لە نوێترین چاوپێکەوتنی تەلەفزیۆنیدا لەگەڵ کەناڵی U TV"ی عێراقی ڕایگەیاند: لە هەڵبژاردنی داهاتوودا دەنگ و کورسیمان زیاد دەکات، چاوەڕوان دەکەین 40 زیاتر بهێنین، بەمەش پلەی یەکەمی سوننەکان بەدەستدەهێنم لە ڕێگەیەوە پۆستی سەرۆککۆمار یاخود پۆستی سەرۆکی پەرلەمان وەردەگرم. 

 

- شیعەکان وەکو برا گەورە لە سێ دەسەڵاتەکە چییان پێ باشبوو هەڵیدەبژێرن، ئێمەش لەدوای ئەوانەوە پۆستی سەرۆککۆمار یاخود سەرۆکی پەرلەمان هەڵدەبژێرین. 

- سەرۆکایەتی کۆماریش لە سەردەمی "غازی عەجیل یاوەر"ەوە (یەکەم سەرۆککۆمار دوای سەدام) بۆ سوننەکان بووە، پێداگریکردن لەم بابەتەدا دەیکاتە پرس و قسەکانی منیش سەبارەت بەم بابەتەوە پشتڕاستکردنەوەی پرەنسیپەکانی حوکمڕانییە، نەک "گێچەڵکردن" بە پارتی دیموکراتی کوردستان.

ئەوەی پێویستە بیزانیت: ئەنجوومەنی وەزیرانی عێراق ڕۆژی 11-11-2025 دیارییکردووە بۆ بەڕێوەچوونی هەڵبژاردنی خولی شەشەمی پەرلەمانی عێراق.

ئەمەش بزانە: لە دوای ڕووخانی ڕژێـمی بەعس لە ساڵی 2003 لە عێراق، پۆستی سەرۆکوەزیران بۆ پێکهاتەی عەرەبی شیعە بووە، پۆستی سەرۆکی پەرلەمانیش بۆ عەرەبی سوننە و سەرۆکایەتی کۆماریش پشکی کوردە و بووەتە عورفێکی سیاسی لە عێراق.