داوای دوورخستنەوە و دادگاییکردنی پارێزگاری بەسرە دەکرێت

ئاڤا نیوز

 

لیژنەی پەرلەمانی عێراق تایبەت بە پێشێلکارییەکانی حکومەتی خۆجێیی بەسرە دەڵێت، لە بەڕێوەبردنی پڕۆژەکان و ئیدارەی پارێزگای بەسرەدا گومانی گەندەڵی دەکرێت، بۆیەش پێشنیاز دەکات ئەسعەد عیدانی، پارێزگاری شارەکە لە پۆستەکەی دووربخرێتەوە و ڕەوانەی دادگا بکرێت.

 

وێنە گەورەکە: لە هەڵبژاردنی پێشووی ئەنجوومەنی پارێزگاکانی عێراق، ئەسعەد عیدانی لیستی تایبەت بە خۆی هەبوو و بووە براوەی یەکەمی پارێزگاکە، بەوەش پۆستی پارێزگاری بەدەستهێنایەوە، بەڵام چەند ڕۆژێکە لەسەر بابەتی زەوی زیادەڕۆ ناکۆکی لەنێوان عیدانی و سەرۆکوەزیرانی عێراقدا دروستبووە.

 

ڕاگەیێنراوی فەرمی: سعود ساعیدی، سەرۆکی لیژنەی پەرلەمانی عێراق تایبەت بە پێشێلکارییەکانی حکومەتی خۆجێیی بەسرە ڕایگەیاند، لیژنەکەیان ڕاسپاردەی خۆی بۆ سەرۆکایەتیی پەرلەمان بەرزکردووەتەوە و تیایدا داوایکردووە ئەسعەد عیدانی، پارێزگاری بەسرە لە پۆستەکەی ببەخشرێت و ڕووبەڕووی دادگا بکرێتەوە، ئەوەش بەهۆی بوونی گومانی گەندەڵی لە بەڕێوەبردنی پڕۆژەکاندا.

 

لیژنەکە پێشنیاز دەکات، ئەو بەرپرسانەی حکومەتی خۆجێی بەسرە کە لەبواری پێدانی پڕۆژەکان بە کۆمپانیاکان کاریان کردووە، بە هەمان هۆکار لە پۆستەکانیان دووربخرێنەوە.