تیرۆرستێکی داواکراو لە عێراق دەبێتە خاوەنی پاسپۆرت و مۆڵەتی شۆفێریی نێودەوڵەتی

ئاڤا نیوز

لە ساڵی 2008 تۆمەتبارێک بە ماددەی تیرۆر فەرمانی گرتنی بۆ دەردەچێ و دوای نۆ ساڵ لەو فەرمانە دەبێتە خاوەن پاسپۆرت و کارتی نیشتمانی بێ ئەوەی کەسیش پێی بزانێت.

چیرۆکی سەرەکی: ساڵی 2008 وەزارەتی ناوخۆ ناو، وێنە و زانیاریی تیرۆرستێک بەسەر گشت بازگە و دامودەزگا سەربازییەکان بڵاودەکاتەوە بۆ ئەوەی لە هەر شوێنێک بینرا دەستبەجێ کەلەپچەی بکەن و دەستبەسەری بکەن، بەڵام ئەوەی جێگەی سەرنجە لە ساڵی 2017 تۆمەتبار سەرلەنوێ پاسپۆرتێکی عێراقی لەسەر هەمان ناو و زانیاریی خۆی وەردەگرێتەوە و کەسیش پێی نازانێت.

ئەوەی پێویستە بیزانیت: هەر بەمەشەوە نەوەستاوە، لە ساڵی 2021 مامەڵەی وەرگرتنی مۆڵەتی شۆفێری لە یەکێک لە بەڕێوەبەرایەتییەکانی هاتووچۆی عێراق بۆ ڕایی دەکرێ و تاقیکردنەوەکانی بەسەرکەوتوویی تێدەپەڕێنێ و دەبێتە خاوەن مۆڵەتی شۆفێریی نێودەوڵەتی.

هاوکات، تۆمەتباری داواکراو چەند مانگێک پێش ئێستا هەڵدەستێت بە گۆڕینی تەزکەرەی بۆ کارتی نیشتمانی و کەسیش نازانێت ئێستا خەریکی چییە.

بەتەنیشت ئەم بابەتەوە: لەپای ئەم کەمتەرخەمییانەی دامودەزگاکانی عێراق، چەند پەرلەمانتارێک لێژنەیەکیان پێکهێناوە بۆ لێکۆڵینەوە لەم کارانە و سزادانی ئەو کەسانەی کە لە ئاسانکاریکردن بۆ تۆمەتبار تێوەگلاون.