دادگەی فیدراڵی؛ پلەبەرزکردنەوەی فەرمانبەران لە پسپۆری ئێمەدا نییە

ئاڤا نیوز

دادگەی فیدراڵی عێراق بڕیاردانی لەبارەی پلەبەرزکردنەوەی فەرمانبەرانی هەرێمی کوردستانی ڕەتکردەوە و ڕایگەیاند لە پسپۆڕی ئەواندا نییە.

وێنە گەورەکە: دوای چەندینجار دواخستن، ئەمڕۆ یەکشەممە دادگەی فیدراڵی عێراق پرسی پلەبەرزکردنەوەی فەرمانبەرانی هەرێمی کوردستانی یەکلاکردەوە. 

چیرۆکی سەرەکی: سەرەتا پارێزەرانی کەیسەکە بە میدیاکانیان گوت: دادگای فیدراڵی بڕیاری داوە و پلەبەرزکردنەوەی فەرمانبەرانی بە پرۆسەی بەئەلیکترۆنیکردنی مووچە بەستووەتەوە، هەروەها دوای کردنەوەی هەژماری بانکی پلەبەرزکردنەوە دەستپێدەکاتەوە، بەڵام لە دەقی بڕیاری دادگادا ئەوە نەهاتووە.

ڕاگەیێنراوی فەرمی: دادگای فیدراڵی عێراق ڕوونیکردووەتەوە؛ بابەتی پلەبەرزکردنەوەی فەرمانبەرانی هەرێمی کوردستان لە دەسەڵاتی ئێمەدا نییە.

گۆشەیەکی دیکە:  وەزیری  پەروەردەی هەرێمی کوردستان ڕۆژی 7-1-2024 لە نووسراوێکدا ڕایگەیاند، ڕەزامەندی ئەنجوومەنی وەزیران وەرگیراوە و دوای هەموارکردنەوەی یاسای بودجە و ناردنی شایستە داراییەکان لەلایەن بەغدا، پلەبەرزکردنەوە دەستپێدەکاتەوە.

بۆچی گرنگە: بەهۆی شەڕی داعش و قەیرانی دارایی و نەناردنی بەشە بودجەی هەرێمی كوردستان لەلایەن حكومەتی عێراق، لە ساڵی 2016ـەوە پلەبەرزكردنەوەی فەرمانبەران ڕاگیراوە.