سەفین دزەیی: بەرژەوەندییەکانی کوردستان و ئەمریکا لە زۆر خاڵدا یەکدەگرنەوە

ئاڤا نیوز

بەرپرسی مەکتەبی پەیوەندییەکانی دەرەوەی هەرێمی کوردستان دەڵێت، خواستی ئەوەمان هەیە پەیوەندییەکانمان لەڕووی ئابوورییەوە لەگەڵ ئەمریکا فراوانتر بکەین و بەرژەوەندییەکانمان لەگەڵ ئەمریکا زۆر خاڵ یەکدەگرێتەوە.

وێنە گەورەکە: پەیوەندییەکانی نێوان هەرێمی کوردستان و ئەمریکا بەردەوام لە بەرەوپێشچووندایە، بەجۆرێک ئەمریکا وەک هاوبەشێکی ستراتیژی و گرنگ لە هەرێمی کوردستان دەڕوانێت، لە ناوچەکەدا. هاوکات ساڵ بە ساڵ قەبارەی بازرگانی نێوانیان زیاتر دەبێت.

لێدوانی فەرمی: سەفین دزەیی، بەرپرسی مەکتەبی پەیوەندییەکانی دەرەوەی هەرێمی کوردستان لە هەڤپەیڤینێکی تایبەتدا لەگەڵ ئاڤا گوتی، "بەرژەوەندییەکانی ئێمە و ئەمریکا لە زۆرخاڵدا یەکدەگرنەوە، نەک تەنیا لە بواری ئابووری، بەڵکو هەندێک بەها هەیە کە بایەخی پێدەدەن لەڕووی دیموکراسی و پێشڤەچوونی کۆمەڵگەی مەدەنی و پێکەوەژیانی پێکهاتەکان."

لەلایەکی دیکەوە: سەبارەت بە گفتوگۆی نێوانیان لەگەڵ کاربەدەستانی ئەمریکا، بەرپرسی مەکتەبی پەیوەندییەکانی دەرەوەی هەرێمی کوردستان ئاماژەی بەوەدا، "بەدەر لە گفتوگۆکردن لەسەر فراوانکردنی پەیوەندی ئابووری نێوانمان، کاریگەری هەرێمی کوردستان لە ناوچەکە و بەربەستە نێوخۆییەکان لە عێراق هەڵوەستەی لەسەرکراوە، ئەوان پاڵپشت دەبن لە چارەسەری کێشەکان."