ئاگادارییەک لە کۆمیسیۆنەوە لەبارەی وەرگرتنی لیستی کاندیدان

ئاڤا نیوز

کۆمیسیۆنی باڵای سەربەخۆی هەڵبژاردنەکانی عێراق لە ئاگادارینامەیەکدا ڕایدەگەیێنێت، لە سبەی یەکشەممەوە دەست بە وەرگرتنی لیستی کاندیدان "لیستی کراوە و تاک" بۆ هەڵبژاردنی داهاتوو دەکرێت.

 

وێنە گەورەکە: بڕیارە 2025-11-11 هەڵبژاردنی خولی شەشەمی پەرلەمانی عێراق بەڕێوەبچێت، کۆمیسیۆنی باڵای هەڵبژاردنەکانیش لە ئامادەکارییەکانی بەردەوامە.

 

ڕاگەیێنراوی فەرمی: بەگوێرەی ڕاگەیێنراوی کۆمیسیۆنی باڵای سەربەخۆی هەڵبژاردنەکانی عێراق، وەرگرتنی لیستی کاندیدان (لیستی کراوە و لیستی تاک) بۆ هەڵبژاردنی خولی شەشەمی پەرلەمانی عێراق 2025-5-25ـەوە دەستپێدەکات و تاوەکو 2025-6-24 بەردەوام دەبێت.

 

ئەوەی پێویستە بیزانیت: بەگوێرەی دوایین ئامارەکانی کۆمیسیۆنی باڵای سەربەخۆی هەڵبژاردنەکانی عێراق، لەکۆی 339 حیزبی مۆڵەتپێدراو، 114 حیزبیان خواستی خۆیان بۆ بەشداریکردن لە هەڵبژاردن دەربڕیووە، ئێستاش 60 حیزبی نوێ لە قۆناغی مۆڵەتپێدان دان.