د. عەبدولحەکیم خەسرۆ: لیستی مووچەی مانگی پێنج ئامادەکراوە و دەنێردێت بۆ بەغدا

ئاڤا نیوز

 

سەرۆکی فەرمانگەی هەماهەنگی و بەدواداچوون دەڵێت: لیستیی مووچەی مانگی پێنج ئامادە کراوە و لەم یەک دوو ڕۆژە دەنێردرێت بۆ بەغدا و ئەم هەفتەیە لە وەزارەتی دارایی عێراق دەبێت و کاری لەسەر دەکرێت.

وێنە گەورەکە: کارکردن لەسەر ئامادەکردنی لیستی مووچەی مانگی پێنج بەردەوامە، بە ئامانجی ئەوەی پێش جەژن مووچەی مووچەخۆرانی هەرێمی کوردستان خەرج بکرێت.

لێدوانی فەرمی: د.عەبدولحەکیم خەسرۆ، سەرۆکی فەرمانگەی هەماهەنگی و بەدواداچوون بە ئاڤا میدیای ڕاگەیاند، لسیتی مووچە بە سیستمی پەیڕۆڵ ئامادەکراوە هیچ گرفتێکی تەکنیکی نییە، ئەگەر هەر گرفتێکی دیکە دروست بکرێت ئەوە تەکنیکی نییە، بەڵکو شتێکی دیکەیە. پلانی حکومەتی عێراق ئەوەیە پێش جەژن مووچەی هەموو فەرمانبەران دابەش بکات بە هەرێمی کوردستانیشەوە.

 

د.عەبدولحەکیم خەسرۆ سەبارەت بە سەردانەکەی مەسرور بارزانی، سەرۆکوەزیرانی کوردستان بۆ واشنتن وتی:

- لە ڕابردوودا عێراق نەیتوانییوە سوود لە تواناکانی خۆی بۆ وزە وەربگرێت، هەرێمی کوردستان سەرنجی لەسەر سیاسەتێکە کە دەوڵەت پشت بە خۆی ببەستێت بۆ وزە.

- ستراتیژیەتی ئەمریکا بۆ ڕۆژهەڵاتی ناوەڕاست گۆڕاوە، هەرێمی کوردستان لەم ناوچەیە دەیەوێت دیدگای خۆی بۆ ئەم گۆڕانکارییە پێشکەش بکات.

 -  لە یەکگرتنەوەی هێزەکانی پێشمەرگە هەنگاوی باشمان ناوە، ئەمە خواستی ئەمریکایە و پاڵپشتییەکانی ئەمریکا بەردەوام دەبێت.

- لە بەغدا ئاراستەیەک هەیە کەرتی وزە بەربەستی بۆ دابنرێت، ئێمە دەمانەوێت وزە بەکاربێنین بۆ پێشخستنی گشت سێکتەرەکان دەکرێت عێراق بەشێک بێت لەو پرۆسەیە.

- عێراق پێویستە سیاسەتێکی سەربەخۆی هەبێت، عێراق لە قەیرانێکی گەورەیە لەبابەتی غاز.

- تا کۆتایی ئەمساڵ هەموو فەرمانبەران دەبنە خاوەنی کارتی بانکی.

- پێویستە هەموو ئەو مامەڵانەی بە کاش دەکرێت، ببن بە بانکی، بۆ ئەوەی ڕێگری لە سپیکردنەوەی پارە بکرێت.

- وەزارەتی نەوتی عێراق پەلەی کردبوو لە دەرکردنی ئەو بەیاننامەیە.