ئەردۆغان و ئەحمەد شەرع کۆدەبنەوە

ئاڤا نیوز

 

ئەحمەد شەرع، سەرۆککۆماری سووریا بۆ قۆناغی ڕاگوزەر بە سەردانێکی ڕانەگەیێنراو گەیشتە تورکیا و لەگەڵ هاوتا تورکییەکەی کۆدەبێتەوە.

 

زانیاری بەدەستهتاوو: ڕۆژی شەممە 24-5-2025، میدیاکانی تورکیا بڵاویانکردەوە، ئەحمەد شەرع، سەرۆککۆماری سووریا بۆ قۆناغی ڕاگوزەر سەردانێکی ڕانەگەیێنراوی بۆ تورکیا ئەنجامدا و لەگەڵ ڕەجەب تەیب ئەردۆغان، سەرۆککۆماری تورکیا لە ئیستەنبووڵ کۆبووەوە، بەڵام هیچ زانیارییەک لە بارەی ناوەڕۆکی کۆبوونەوەکە ئاشکرا نەکراوە.

 

ئەوەی پێویستە بیزانیت: لە کۆبوونەوەکەدا باسی کورد و رێککەوتنی هەسەدە و دیمەشق کراوە، کە رێککەوتنەکە یەکگرتنی سەربازی و ئیداری و ئەمنی دەگرێتەوە و بڕیارە تا کۆتایی ئەمساڵ جێبەجێ بکرێت و ئیتر هەسەدە ببێتە بەشێک لە سوپای سووریا.

توركیا پێیوایه‌ ڕێککەوتنەکە به‌شێوه‌یه‌كی ئه‌رێنی به‌ڕێوه‌ ناچێت، زانیارییە میدیاییەکان باس لەوە دەکەن ئەردۆغان بەفەرمی نیگەرانی لەبارەی ڕێککەوتنەکە بە ئەحمەد شەرع گەیاندووە و پێی وتووە پەلەی لێ بکەن.

 

زانیاریی زیاتر: ئەم کۆبوونەوە دوای ئەوە هات، کە دوێنێ میدیاکان ئاشکرایان کرد، تورکیا ڕۆڵی هەبووە لە ئەنجامدانی کۆبوونەوەی نێوان نوێنەرانیی ئیدارەی نوێی سووریا و نوێنەرانی ئیسرائیل و ڕایانگەیاند، کۆبوونەوەکان ئەرێنی بوون.  

 

قووڵتر: دوای کۆتایی هاتنی دەسەڵاتی بەشار ئەسەد لە سووریا، حکومەتی تورکیا ڕۆڵێکی بەرچاوی هەبووە لە پشتیوانیکردنی دەسەڵاتی نوێی سووریا و هاوکاریکردنی بۆ بوژانەوەی ئابووری ئەو وڵاتە، ئێستا هەردوو وڵات پەیوەندییەکی دیپلۆماسی پتەویان هەیە.