ئاگرێکی گەورە لە سنووری دووکان حەوت کاتژمێرە کۆنترۆل نەکراوە

ئاڤا نیوز

کاتژمێر چواری ئیوارەی ئەمڕۆ ئاگرێکی گەورە لە نزیک گوندی قەمچووغە لە سنووری قەزای دووکان کەوتووەتەوە  و ماوەی حەوت کاتژمێرە کۆنترۆڵ نەکراوە.

چیرۆکی سەرەکی: سەرەتای هەڵبوونی ئاگرەکە زۆر کەم بووە و خەڵکی ناوچەکە گرنگییان پێنەداوە، بەڵام دواتر بەهۆی بای بەهێزەوە ئاگرەکە تەشەنەی سەندووە و  فراوانتر بووە، ژمارەیەک لە تیمی بەرگریی شارستانی سەرقاڵی کوژانەن، بەڵام تائێستا نەتوانراوە کۆنترڵ بکرێت.

لێدوانی فەرمی: ژیوار عەبدوڵرەحمان، پەیامنێر ئاڤا، ڕایگەیاند، لەو کاتەی ئاگرەکە کەوتووەتەوە و تەشەنەی سەندووە، چوار تیمی بەرگریی شارستانی سەرقاڵی کۆنترۆڵکردنی ئاگرەکەن، بەڵام بەهۆی سەختی ڕێگاکە و ناوچەکە نەتوانراوە ئاگرەکە کۆنترۆڵ بکەن، جگە لە تیمی بەرگریی شارستانی گوندنشیناش سەرقاڵی کوژاندنەوەی ئاگرەکەن.

- تاوەکو ئێستا هۆکاری ئاگرکەوتنەوەکە دیار نییە.

- جگە لە زیانی ماددی، هیچ زیانێکی گیانی نەبووە.

- ئاگرەکە لە ڕەز و باغی هاووڵاتییان دوورکەوتووەتەوە و بەرەو کێوەکان دەڕوات، بە پێی پێشبینییەکان تا بەرەبەیانیش بەردەوام دەبێت.