کۆمیسیۆن: کارمەندانی دەزگا ئەمنییەکان ناتوانن خۆیان کاندید بکەن

ئاڤا نیوز

 

پرۆسەی تۆمارکردنی لیست و هاوپەیمانێتییەکان بۆ هەڵبژاردنی خولی شەشەمی پەرلەمانی عێراق لەسەرجەم ئۆفیسەکانی کۆمیسیۆن دەستیپێکردووە، بەگوێرەی ڕێنماییەکان کارمەندانی هێزە چەکدار و دەزگا ئەمنییەکان ناتوانن خۆیان کاندید بکەن.

 

وێنە گەورەکە: بڕیارە 2025-11-11 هەڵبژاردنی خولی شەشەمی پەرلەمانی عێراق بکرێت، لەیەکەم ڕۆژی دەستپێکردنی پرۆسەکە کۆمیسیۆنی باڵای هەڵبژاردنەکانیش لە ئامادەکارییەکانی بەردەوامە، کۆمەڵێک مەرجی بڵاوکردەوە بۆ کاندیدی سەربەخۆ، پێکهاتەکان، لیست و هاوپەیمانێتییەکان.

 

لێدوانی فەرمی: مەڕوان محەممەد، بەرپرسی ئۆفیسی هەولێری کۆمیسیۆنی هەڵبژاردنەکانی عێراق گوتی، "مەرج نییە کاندید دانیشتووی ئەو بازنەیە بێت کە خۆی لێی کاندید دەکات، بەڵام نابێت کارمەندانی هێزە چەکدار و دەزگا ئەمنییەکان بێت، ئەو توێژانە ناتوانن خۆیان کاندید بکەن."

 

مەرجەکان چین: دیارترین ئەو مەرجانەی کە پێویستە خوازیار هەی بێت:-

- پێویستە هەڵگری ڕەگەزنامەی عێراقی بێت.
- تەمەنی 30ی تەواو کردبێت. 
- هەڵگری بڕوانامەی بەکالۆریۆس بێت.
- لیستی کراوە واتا هاوپەیمانی و لایەنە سیاسییەکان، دەتوانن کەسانی هەڵگری بڕوانامەی دیبلۆم یان هەڵگری بڕوانامەی ئامادەیی کاندید بکەن، بەڵام نابێت ڕێژەکەی لە  20٪ زیاتر بێت. 
- ئەو کەسە نابێت لە بابەتی گەندەڵی تێوەگلابێت. 
- ئەو کەسە نابێت لە بابەتی دارایی تێوەگلابێت.
-نابێت داوەر یاخود ئەندامی ئەنجوومەنی کۆمیسیاران بێت. 
-هەر لیستێک پێشتر سزا درابێت تاوەکو سزاکەی نەدات تۆمار ناکرێت. 

 

لەلایەکی دیکەوە: پێکهاتەکان دەتوانن کەسانی هەڵگری بڕوانامەی ئامادەیی یاخود دیبلۆم کاندید بکەن و لەسەر ئاستی عێراق بە یەک بازنە بۆیان هەژمار دەکرێت.