پەیامێکی نوێ لە سەرۆک بارزانییەوە بۆ بەغدا: نابێت قووتی هاووڵاتیان بە سیاسی بکرێت

ئاڤا نیوز

سەرۆک بارزانی پەیامێکی نوێ بۆ بەغدا دەنێرێت و دەڵێت، دەبێت لە عێراق دەستوور جێبەجێ بکرێت و ناکرێت قووتی هاووڵاتیان بە سیاسی بكرێت.

 

چیرۆکی سەرەکی: پێشنیوەڕۆی ئەمڕۆ یەکشەممە، سەرۆك بارزانی پێشوازیی لە ژمارەیەك ئەمیر و سەرۆك هۆز و كەسایەتیی هۆزەكانی پارێزگاكانی باشوور و ناوەڕاستی عێراق کرد. لە دیدارەکەدا سەرۆک بارزانی باسی مێژووی دامەزراندنی دەوڵەت و دەستووری عێراق و مووچەی خەڵکی کوردستانی کرد.

 

ڕاگەیێنراوی فەرمی: سەرۆک بارزانی لەمیانی کۆبوونەوەکەدا ڕایگەیاند، ناكرێت قووتی هاووڵاتیان بە سیاسی بكرێت و وەك چەكێك لە دژی خەڵكی كوردستان بەكار بهێنرێت.

لەبارەی دەستووری عێراقیشەوە، جەختیشی لەوە كردەوە، حوكمڕانیی لە عێراق كاتێك سەركەوتوو دەبێت كە دەستوور جێبەجێ بكرێت و هەموولایەك پابەندی هەر سێ پڕەنسیپی هاوسەنگی و سازان و هاوبەشی بن.

 

بۆچوونی لایەنی بەرامبەر: لە دیدارەکە شاندی میوان سوپاسی هەڵوێستی سەرۆك بارزانیان كرد بۆ هەوڵدان بۆ جێگیركردنی سەقامگیری و قووڵكردنەوەی پێكەوەژیان و برایەتی، هەروەها سوپاسی گەلی كوردستانیان كرد كە لە ڕۆژانی تەنگانە و شەڕی تیرۆردا باوەشیان بۆ ژمارەیەكی زۆری ئاوارە لە بەشەكانی دیکەی عێراق كردەوە.

 

لەلایەکی دیکە: ڕێککەوتی 15ـی 5ـی 2025،  سەرۆك بارزانی لە چوارچێوەی گوتارێکدا لە كۆنگرەی یەكگرتنی هەردوو ڕێكخراوی یەكێتی قوتابییان و یەكێتی لاوانی کوردستان، باسی کێشەکانی نێوان هەرێمی کوردستان و عێراقی کرد و ڕایگەیاند، کاتی ئەوە هاتووە بە زمانێکی زۆر ڕوون لەگەڵ بەغدا قسە بکەین. هەر لە گوتەرەکەیدا گوتیشی، ئەو مامەڵەیەی بە‌غدا لەبارەی مووچە لەگەڵ هەرێمی کوردستان دەیکات، ئیتر مایەی قبووڵ کردن نییە.