ئاڤا بەدواداچوون لەبارەی کڕین و فرۆشتنی جگەرەی ئەلیکترۆنی دەکات

ئاڤا نیوز

ئاڤا میدیا لەچەند شوێن و بازاڕێک لە شاری هەولێر بە نهێنی بەدواداچوونی لەبارەی کڕین و فرۆشتنی جگەرەی ئەلیکترۆنی کرد، دوای نیو کاتژمێر توانی لە دوو شوێنی جیاواز جگەرەی ئەلیکترۆنی دەستبکەوێت.

وێنە گەورەکە: هەرچەندە بەبڕیار فرۆشتنی ڤەیپ یان جگەرەی ئەلیکترۆنی قەدەغەکراوە و ڕێکاری توند لەمبارەیەوە گیراوەتەبەر، بەڵام تا ئێستاش لە هەندێک مارکێت و بازاڕ و شوێنە گشتییەکان بەنهێنی کڕینی و فرۆشتنی پێوە دەکرێت.

زانیاریی پەیامنێر: لەچەند شوێن و بازاڕێک بە کامێرای نهێنی بەدواداچوونمان کرد تاوەکو بزانین ڤەیپ کڕین و فرۆشتنی پێوە دەکرێت یاخود نا، هەمووی دوای چەند پرسیارێک و نزیکەی 30 خولەک گەڕان، لەدوو شوێنی جیاواز جگەرەی ئەلیکترۆنیمان دەست کەوت.

لێدوانی فەرمی: ڕەوا فەرحان، تەمەنی 17 ساڵە و ڕۆژانە نزیکەی 16 کاتژمێر جگەرەی ئەلیکترۆنی بەکاردەهێنێت، تەنانەت ئەو کاتانەشی لەسەر کارە، ئەو دەڵێت: بە ئاشکرا و بە شاراوە کڕین و فرۆشتن بە ڤەیپەوە دەکرێت و لەدوای قەدەغەکردنیشییەوە نرخەکەی بەرز بۆتەوە.

لەلایەکی دیکەوە: نەبەز عەبدولحەمید، قائیمقامی قەزای ناوەندیی هەولێر بە ئاڤای ڕاگەیاند، لیژنەکانی بەڕێوەبەرایەتیی چاودێری بازرگانی و قائیمقامیەتی هەولێر لەدرێژەی هەڵمەتەکانیان لەتەواوی پار ساڵ توانیویانە دەست بەسەر نزیکەی 24 هەزار ڤەیپ یان جگەرەی ئەلیکترۆنیدا بگرن و لەناوی ببەن، لەسەرەتای ئەمساڵیشەوە تا ئێستا زیاتر لە 11 هەزار و 500 جگەرەی ئەلیکترۆنی دەستی بەسەرداگیراوە و لەناو بردراوە، بەدرێژایی ئەم ساڵ و نیوەش زیاتر لە 38 شوێن داخراوەن.

ئەوەی پێویستە بیزانیت: لە سەرەتای ساڵی 2024ەوە بە بڕیارێکی وەزارەتی تەندروستیی حکومەتی هەرێمی کوردستان فرۆشتنی جگەرەی ئەلیکترۆنی قەدەغەکراوە، هەر کەسێکیش کڕین و فرۆشتنی پێوە بکات، تەواوی جگەرە ئەلیکترۆنییەکانی دەستی بەسەردا دەگیرێت و شوێنەکەی دادەخرێت، ئەمە لەگەڵ سزادانی کەسەکە بە بڕی یەک تا 5 ملیۆن دینار.