هیچ ئاژەڵێک بێ بڕوانامەی تەندروستی هاوردە ناکرێت

ئاڤا نیوز

حکومەتی هەرێمی کوردستان، چاودێری لەسەر هاوردەکردنی ئاژەڵ لە دەروازە سنوورییەکان چڕ دەکاتەوە، هەر وڵاتێک نەخۆشی ئاژەڵی هەبێت، ڕێگە بە بازرگانەکان نادرێت ئاژەڵی لێ هاوردە بکەن.

وێنە گەورەکە: بەهۆی نزیک بوونەوەی جەژنی قوربان، خواست لەسەر ئاژەڵ زیادیکردووە ئەمە لە کاتێکدایە کە چەندین تووشبوون و گیانلەدەستدان بەهۆی تای خوێنبەربوون تۆمارکراون، لیژنە هاوبەشەکانی تەندروستی و کشتوکاڵ کار لەسەر چڕکردنەوەی چاودێری و جێبەجێکردنی ڕێکارەکان دەکەن.

لێدوانی فەرمی: فیراز سدیق، بەڕێوه‌بەری سامانی ئاژەڵ لە وەزارەتی کشتوکاڵ بە ئاڤای گوت، "هەر ئاژەڵێک لە هەر وڵاتێک هاوردە بکرێت دەبێ بڕوانامەی تەندروستی هەبێت، بەهەموو ئەو ڤاکسین و دەرمانەی پێیدراون، هەروەها مەرجە چەند ڕۆژێک کەرەنتینە کرابێت، ئینجا هاوردە بکرێت، لەدیوی هەرێمی کوردستانیش سێ ڕۆژ کەرەنتینە دەکرێت."

زانیاریی زیاتر: ئەو دەروازانەی شوێنی کەرەنتین نییە، ئەو بازرگانەی ئاژەڵەکە هاوردە دەکات دەبێت شوێنێکی تایبەتی هەبێت هەموو ڕێکارە تەندروستییەکانی تێدا بێت و ئاژەڵەکە کەرەنتین بکات، بەردەوامیش لیژنەکان سەردانی دەکەن.

ئەوەی پێویستە بیزانیت: هەرێمی کوردستان ساڵانە 90 هەزار تۆن گۆشتی سووری پێویستە، 50 هەزار تۆن گۆشت لە ناوخۆ دابین دەکرێت، 40 هەزار تۆن لەوڵاتانی بەڕازیل، ئەرمێنیا، بولگاریا و جۆرجیا هاوردە دەکرێت.