وردبینی لە لیستی مووچەی مانگی پێنج لەلایەن بەغدا بەردەوامە

ئاڤا نیوز 

 

لە بەغدا وردبینیکردن لە لیستی مووچەی مانگی پێنج بەردەوامە و تاوەکو ئێستا هیچ گرفتێکی نییە، بەپێی مانگەکانی ڕابردوو بێت لە چەند ڕۆژێکدا تەواو دەبێت و بەغدا مووچەکە دەنێرێت. 

 

وێنە گەورەکە: حکومەتی هەرێمی کوردستان، هەرسێ ئەرکەکەی خۆی پەیوەست بە ناردنی پارە لەلایەن بەغداوە جێبەجێ کردووە، لەماوەی دوو هەفتەدا لیستی مووچە، میزان موراجەعە و داهاتی ناوخۆی مانگی چواری ڕادەست کردووە، ماوەتەوە سەر ئەوەی دوای تەواوبوونی وردبینی لەلیستی مووچە پارە خەرج بکرێت.

زانیاریی بەدەستهاتوو: ئاڤا زانیویەتی ئەگەر هیچی نوێ لەلایەن بەغداوە نەیەتە پێش، دوای تەواوبوونی وردبینی و  ڕەزامەندیدان پارەکە خەرج دەکرێت. 

 

لێدوانی فەرمی: سەرچاوەیەک لە وەزارەتی دارایی کوردستان بە ئاڤای گوت، "وردبینیکردن لە لیستی مووچە لەلایەن بەغدا بە چەند ڕۆژێک تەواو دەبێت، تاوەکو ئێستا هیچ کێشەیەکی بۆ دروست نەبووە، ئەگەر پرسیار و تێبینیش هەبێت و پێویستیان بە وەڵام  و ڕوونکردنەوە بێت، ئێمە ئامادەین و دەستبەجێ چییان بووێت دەیکەین و وەڵام و ڕوونکردنەوەیان پێدەدەین".

لەلایەکی دیکەوە: وەزارەتی دارایی و ئابووریی کوردستان سەرجەم ئەو ئەرک و پابەندییانەی لەگەڵ وەزارەتی دارایی عێراق لەسەری ڕێککەوتوون بۆ ناردنی مووچە جێبەجێی کردوون، ئیتر چاوەڕوانە پێش جەژنی قوربان پارە لە بەغداوە بنێردرێت و دەست بە دابەشکردنی بکرێت.