ئاڤا گەورەترین گەندەڵی لە فایلی خۆراکی زیندانییانی عێراق ئاشکرا دەکات

ئاڤا نیوز

ئاڤا لەزاری سەرچاوەیەکی پاوەڕپێکراوەوە گەندەڵی لە فایلی خۆراکی زیندانییانی عێراق ئاشکرا دەکات، هاوکات دەستەی دەستپاکی و دادگاکانی عێراق بەدواداچوون بۆ چەندین دۆسیەی پەیوەست بەم بابەتە دەکەن کە لەلایەن ئەندامانی پەرلەمانی عێراقەوە پێشکەشی نەزاهەی عێراق کراون.

لێدوانی فەرمی: عەلی ناسر، پسپۆڕی کاروباری سیاسی و مرۆیی بەئاڤای ڕاگەیاند: ئەو کۆمپانیایانەی کە خۆراک بۆ زیندانییان دابین دەکەن، بەپێی گرێبەستەکانیان خواردن و خواردنەوە بۆ زیندانییان ئامادەناکەن بەو پێیەی خواردنەکان لەڕووی جۆر و کوالێتییەوە زۆر خراپن و ژەمەکانیش لەکاتی خۆیدا دابەش ناکرێت.

لەلایەکی دیکەوە: وەزارەتی داد وەڵامی ئەم بابەتەی داوەتەوە و وتەبێژەکەی ڕایگەیاند، ئەم دۆسیەیە لەلایەن وەزارەتەکەیانەوە چاودێری دەکرێت، بەبێ ئەوەی وردەکاری زیاتر ئاشکرا بکات.

ئەوەی پێویستە بیزانیت: حکومەت مانگانە بڕی پێنج ملیۆن دۆلار، واتە نزیکەی 240 ملیۆن دینار لە ڕۆژێکدا بۆ خواردنی زیندانییان خەرج دەکات، ئەم بڕە پارەیەش کەم نییە بۆ خواردنی پەنجا شەست هەزار زیندانی کە بەشێکیان هەر خواردنی بەر ناکەوێت.