ئەم مانگە خانەنشینانی نوێ 12 مووچەکە وەردەگرن

ئاڤا نیوز

 

بەڕێوەبەرایەتیی گشتیی خانەنشینی هەرێمی کوردستان، لیستی خانەنشینانی نوێی ڕەوانەی وەزارەتی دارایی عێراق کرد و دوای وەرگرتنی ڕەزامەندی، 12 مووچەکە وەردەگرن.

 

وێنە گەورەکە: بەگوێرەی ڕێنمایی خانەنشینی، ئەو فەرمانبەرانەی کە لە سەرەتای ئەمساڵەوە خانەنشین بوون، 25 ساڵ خزمەت و 180 ڕۆژ مۆڵەتی کۆکراوەیان هەیە، 12 مووچەیان بۆ خەرج دەکرێت. تاوەکو ئێستا مامەڵەی 10 هەزار و 500 خانەنشین تەواوبووە، نزیکەی دوو هەزار و 500 کەسیش 12 مووچەکە دەیگرێتەوە.

 

لێدوانی فەرمی: سەرچاوەیەک لە بەڕێوەبەرایەتیی گشتیی خانەنشینی هەرێمی کوردستان بە ئاڤای گوت، "لیستی ئەو خانەنشینانەی 12 مووچەکە دەیانگرێتەوە بەجیا نێردراون، خەرجکردنی پارەکە دەکەوێتە دوای خەرجکردنی مووچەی مانگی پێنج."

 

ئەوەی پێویستە بیزانیت: 15-1-2025، سەرۆكوەزیران مەسرور بارزانی، بە نووسراوی ژمارە 191 بڕیاری كەمكردنەوەی تەمەنی خانەنشینی لە 63 ساڵەوە بۆ 60 ساڵ دا، هاوكات ماوەی خزمەتی لە 15 ساڵەوە بەرز كردەوە بۆ 25 ساڵ، ئەم پرۆسەیەش نزیکەی 27 هەزار فەرمانبەر دەگرێتەوە.