پارتی لە نەینەوا: بە لیستی جیا بەشداری لە هەڵبژاردنی پەرلەمانی عێراق دەکەین

ئاڤا نیوز

 

لایەنە سیاسییەکانی کوردستان ئامادەکاری بۆ بەشداریکردن لە هەڵبژاردنی خولی شەشەمی پەرلەمانی عێراق دەکەن، پارتی دیموکراتی کوردستان لە بازنەی نەینەوا ناچێتە نێو هیچ هاوپەیمانێتییەک و لەکەرکووک هەوڵی پێکهێنانی هاوپەیمانێتییەک دەدات.

 

وێنە گەورەکە: بڕیارە 2025-11-11، هەڵبژاردنی ئەنجوومەنی نوێنەرانیی عێراق بەڕێوەبچێت، یەکێتی نیشتمانی کوردستان لەگەڵ دوو لایەنی دیکە هاوپەیمانێتی لە نەینەوا پێکهێناوە، بەڵام تاوەکو ئێستا لەو بازنەیە پارتی نەچووەتە نێو هیچ هاوپەیمانێتییەک.

 

لێدوانی فەرمی: مەناف حەسەن، بەرپرسی نووسینگەی ھەڵبژاردنەکانی پارتی لە مووسڵ بە ئاڤای گوت، "تاوەکو ئەمڕۆ هیچ گفتوگۆیەکمان لەگەڵ هیچ لایەنێک نەکردووە بۆ دروستکردنی هاوپەیمانی و ئەوەی تا ئێستا ڕوونە بەجیا بەشداری لە هەڵبژاردن دەکەین".

 

ئەمەش بزانە: پارتی لە پارێزگای نەینەوا لە هەڵبژاردنی ساڵی 2021دا  118 هەزار و 606  دەنگی هێنا، نۆ کورسی پەرلەمانی عێراقی بردەوە، یەکێتی لەو بازنەیە دوو کورسی بەدەستهێنا.

 

لەلایەکی دیکەوە: کاوە ئەحمەد، کارگێڕی لقی سێی پارتی لە کەرکووک بۆ ئاڤا ڕایگەیاند، "بۆ ئەوەی هیچ کورسییەکی کورد لە کەرکووک نەفەوتێت، دەمانەوێت بەیەک لیست لەگەڵ لایەنە کوردستانییەکان بەشداری بکەین، ئەگەر یەکێتیش بەشدار نەبێت ئامادەین لەگەڵ لایەنەکانی دیکە هاوپەیمانی دروست بکەین."