ڕێگری لە هەناردەی کاڵا لە هەرێمی کوردستان بۆ شارەکانی عێراق دەستیپێکردووەتەوە

ئاڤا نیوز

سەرەڕای ڕێککەوتنی نێوان هەولێر و بەغدا بۆ دەستپێکردنەوەی هەناردەکردنی کاڵا و بەرهەم لە کوردستانەوە بۆ عێراق، بەڵام جارێکی دیکە لە دەروازەکانی عێراق ڕێگری دەکرێت.

 

چیرۆکی سەرەکی: لە ڕۆژی 06-05-2025، دوای دوو ساڵ، لە بەغدا شاندی ژوورە بازرگانییەکانی هەرێمی کوردستان و یەکێتیی ژوورە بازرگانییەکانی عێراق لەسەر کۆمەڵێک خاڵ ڕێککەوتن، بۆ ئەوەی دووبارە دەست بە هەناردەی کاڵا لە هەرێمی کوردستانەوە بۆ پارێزگاکانی عێراق بکرێتەوە.

 

لێدوانی فەرمی: شوکری جەمیل، سەرۆکی ژووری بازرگانی و پیشەسازیی دهۆک بە ئاڤای گوت، "بەبیانووی ئەوەی بارەکان لە 14-04-2025 داخڵ بوون، نەیانهێشتووە چوار بارهەڵگری کەلوپەل و خۆراک لە مووسڵ دەرباز ببن، بەڵام لەسەر هێڵین بۆ ئەوەی کێشەکە چارەسەر بکەین و بارەکان تێپەڕببن."

 

ئەوەی پێویستە بیزانیت: بەگوێرەی ئەو ڕێککەوتنە نوێیەی کراوە، هەر بارهەڵگرێک کە داخل دەبێت، پشکنینی بۆ دەکرێت و گومرگی لێوەردەگیرێت، مەنەفێست و پێناسی گومرگی دەکرێت، ئینجا مۆر دەکرێت و بارەکە قوفڵ دەکرێت، ڕاستەوخۆ بەرەو ئەو شارە بەڕێدەکرێت کە بارەکەی بۆ هاتووە.

 

زانیاریی زیاتر: نزیکەی 70%ـی ئەو بەرهەمانەی هاوردەی هەرێمی کوردستان دەکرێن، لەگەڵ ئەو بەرهەمە جۆراوجۆرانەی لە کۆمپانیا و کارگەکانی هەرێمی کوردستان بەرهەم دەهێنرێن، لە بازاڕی پارێزگاکانی ناوەڕاست و خوارووی عێراق ساغ دەکرێنەوە.