وردبینیکردن لە لیستی مووچەی مانگی پێنج تەواو بوو

ئاڤا نیوز

 

سەرچاوەیەک لە وەزارەتی دارایی و ئابووری هەرێمی کوردستان ڕایدەگەیێنێ، "وردبینی لیستی مووچەی مانگی پێنج تەواو بووە". ئێستا چاوەڕوان دەکرێت پێش جەژن تەمویلی مووچەی مانگی پێنجی مووچەخۆرانی کوردستان لەلایەن بەغداوە بکرێت.

 

وێنە گەورەکە: سێ ڕۆژە لیستی مووچەی مانگی پێنج ڕادەستی وەزارەتی دارایی عێراق کراوە. وەزارەتی دارایی هەرێمی کوردستان سەرجەم ئەرکەکانی سەرشانی کە خۆی دەبینێتەوە لە ڕادەستکردنی لیستی مووچەی مانگی پێنج و داهاتی نانەوتی و تەرازووی پێداچوونەی مانگی چوار جێبەجێ کردووە، ئەوەی ئێستا ماوەتەوە ئەوەیە بڕیاری خەرجکردنی پارە بدرێت.

 

لێدوانی فەرمی: سەرچاوەیەکی باڵا لە حکومەتی هەرێمی کوردستان بە ئاڤا میدیای ڕاگەیاند: وردبینی لیستی مووچەی مانگی پێنج تەواو بووە، وەزارەتی دارایی عێراقیش هیچ تێبینیەکی لەسەر لیستەکە نەبووە.

 

ئێستا چی ڕوودەدات: بۆ ئەوەی لە نزیکەوە ئاگاداری وردبینی و ڕێکارەکانی خەرجکردنی پارە بن، ئێستا تیمێکی تەکنیکی وەزارەتی دارایی و ئابووری کوردستان لە بەغدایە.

 

ئەوەی پێشبینی دەکرێت: وەزارەتی دارایی و ئابووری بۆ دابەشکردنی مووچە چاوەڕوانی ناردنی پارە دەکات، لە ئەگەری ناردنی پارەدا پێش جەژنی قوربان مووچە دابەش دەکرێت.

 

ئەوەی پێویستە بیزانیت: وەزارەتی دارایی و ئابووریی حکومەتی هەرێمی کوردستان، بۆ مووچەی مانگی پێنج داوای 975 ملیار دیناری کردووە، ئەمە لەکاتێکدایە بۆ مووچەی مانگی چوار بەغدا 959 ملیار دیناری بۆ هەرێمی کوردستان نارد.