وەزارەتی کاری عێراق بۆ ئاڤا: هەڵمەتی دۆزینەوەی کرێکارانی بیانی بەردەوامە

ئاڤا نیوز

وەزارەتی کار و کاروباری کۆمەڵایەتی عێراق جەخت لە بەردەوامبوونی هەڵمەتی بەدواداچوون بۆ دۆزینەوەی کرێکارانی بیانی ئەوانەی بە شێوەی نایاسایی هاتوونەتە نێو عێراق لەسەرجەم پارێزگاکاندا دەکاتەوەو ئاماژە بۆ ئەوەش دەکات، ڕێوشوێنەکانیان بەرامبەر ئەو کۆمپانیاو لایەنانەش تووندکردەوەتەوە کە ئەو کرێکارانە لەخۆیان دەگرن.

وێنە گەورەکە: بەگوێرەی ئامارە فەرمییەکان لە عێراق 43 هەزار کرێکاری بیانی هەن کە مۆڵەتی کارکردنیان هەیە، بە دەیان هەزاری دیکەش بە شێوەی نایاسایی هاتوونەتە نێو عێراق و ساڵانەش بە هەزارانیان دیپۆرتی وڵاتەکانیان دەکرێنەوە.

لێدوانی فەرمی: کازم عەتوانی، بەڕێوەبەری گشتیی فەرمانگەی ڕاگەیاندن و پەیوەندییە عەرەبی و نێودەوڵەتییەکان لە وەزارەتی کار بە ئاڤا میدیای ڕاگەیاند: هەڵمەتی وەزارەتی کار بە هەماهەنگی لەگەڵ دەزگا ئەمنییەکان و لایەنە پەیوەندیدارەکانی دیکە بۆ ڕێگریکردن لە بوونی کرێکاری بیانی نایاسایی لە سەرجەم شار و پارێزگاکانی عێراق بەردەوامە.

دەرئەنجامەکان: بە وتەی عەتوانی "ئەم هەڵمەتە لەماوەی چەند مانگی ڕابردوودا سەرکەوتنی گەورەی بەدەستهێناوە لەدۆزینەوەی چەندین حاڵەتی لەو شێوەیە، لەسەر ئەو بابەتەش سەرپێچیکاران لە خاوەن ماڵ و دوکان و ئەوانی دیکە سزادراون.

کاریگەریی و لێکەوتەکان: عەتوانی ئاماژەی بە "لێکەوتەکانی ئەو دیاردەیە کرد کە لەناو دەوڵەتدا بەجێی دەهێڵێت و ڕایگەیاند، کرێکارانی بیانی نایاسایی کاریگەری ئابوورییان لەسەر بارودۆخی ناوخۆی عێراق و لێکەوتەی ئەمنیش هەیە.

چارەسەرەکان: کازم عەتوانی بەپێویستی زانی، ئەو جۆرە کرێکارانە بە فەرمی لەلایەنە فەرمییەکانی وەزارەتی ناوخۆ و وەزارەتی کار تۆمار بکرێن و و گوتیشی: کاردەکەین بۆ تووندکردنی ڕێوشوێنەکان و سزادانی ئەو کۆمپانیایانەی کە کرێکاری بیانی لەخۆ دەگرن، ئەو کرێکارانەی کە بەشێوەی نایاسایی و هاتوونەتە ناوەوە.