به‌ڕێوه‌به‌ری نووسینگه‌ی قوباد تاڵه‌بانی وەڵامی لاهوور شێخ جەنگی دەداتەوە

ئاڤا نیوز

به‌ڕێوه‌به‌ری نووسینگه‌ی قوباد تاڵه‌بانی وەڵامی لاهوور شێخ جەنگی و دەڵێت: دوو پڕۆژەی گەشتیاریی لە تەنیشت یاریگەی نەورۆز جێبەجێ دەکرێن.

 

چیرۆکی سەرەکی: هەفتەی ڕابردوو لاهوور شێخ جەنگی، سەرۆکی فەخری یانەی نەورۆز، لەدوای بەڕێوەچوونی یاری یانەکەی، لە کۆنگرەیەکی ڕۆژنامەوانیدا هێرشی تووندی کردە سەر بافڵ تاڵەبانی، سەرۆکی یەکێتیی نیشتمانیی کوردستان و قوباد تاڵەبانی، جێگری سەرۆکوەزیرانی هەرێمی کوردستان و گوتی: ناهێڵین هیچ کەسێک پڕۆژە لە دەورووبەری یاریگەی نەورۆز دروست بکات.

 

لێدوانی فەرمی: عه‌تا محه‌ممه‌د، به‌ڕێوه‌به‌ری نووسینگه‌ی قوباد تاڵه‌بانی، لە وەڵامی لاهوور شێخ جەنگیدا گوتی، "دوو پرۆژه‌ی گەشتیاریی له‌ ته‌نیشت یاریگەی نه‌ورۆز ئاماده‌ کراون، سه‌دا 70ی‌ گه‌شتیارییه‌ و سه‌دا 30 نیشته‌جێبوونە، به‌پێی‌ یاسا و ڕێنماییه‌کان جێبه‌جێ ده‌کرێن".

 

دەشڵێت، "له‌مه‌دوا هیچ فیرعه‌ونێک زاتی ئه‌وه‌ ناکات سه‌رانه‌ له‌ وه‌به‌رهێنه‌ران وه‌ربگرێت، تاوەکو بافڵ تاڵەبانی؛ سەرۆکی یەکێتی بێت و قوباد تاڵه‌بانی‌ که‌سی‌ یه‌که‌می‌ ئیداره‌ بێت له‌م سنووره‌، با که‌س له‌ ژیانی خۆی نه‌ترسێت."

 

زانیاریی تایبەت: بەگوێرەی بەدواداچوونی ئاڤا، پڕۆژەکان جددین و مۆڵەت دراوە بەچەند وەبەرهێنەرێک دراوە تاوەکو لەسەر ئەو زەوییانە کۆڕنیشی دەروازە و شوێنێکی گەشتیاری و یەکەیەکی نیشتەجێبوون لەسەر دروستبکرێت. لە نووسینگەی  قوباد تاڵه‌بانییەوە بە وەبەرهێنەرەکانیان گوتراوە کە بڕۆن دەست بە کاری خۆتان بکەن و حیساب بۆ کەس نەکەن، بڕیارە لە 15 ڕۆژی داهاتوودا دەستبەکار بکەن، پڕۆژەکان ڕێک چواردەوری یاریگەی نەورۆز دەگرن و بەمەش ڕێگای چوونە ژوورە بۆ یاریگەکە نامێنیت.

 

باکگراوند: ڕۆژی 18-05-2025 لاهوور شێخ جەنگی، سەرۆکی فەرخری یانەی نەورۆز گوتی، "کاک قوباد ئه‌م شاره‌ی‌ تێکداوه‌، زه‌وییان نه‌هێشت له‌ سلێمانی‌، چاویشتان ده‌ربێت نایه‌ڵم ته‌دا‌خولی‌ ئه‌م ناوچه‌یه‌ بکەن، کێ‌ خۆی‌ به‌ پیاو ده‌زانێت بابێت، هه‌ر بازرگانێک بیر له‌وه‌ بکاته‌وه‌ بێت لێره‌ پرۆژه‌ بکات، به‌بێ‌ ئاگاداری‌ ئێمه‌، خاوەنی ژیانی‌ خۆی‌ نییه.‌"