د.عەبدولحەكیم خەسرەو: بڕیارەكەی وەزارەتی دارایی عێراق هیچ بنەمایەكی نییە

ئاڤا نیوز

سەرۆکی فەرمانگەی هەماهەنگی و بەدواداچوون لە ئەنجوومەنی وەزیرانی هەرێمی کوردستان کە یەکێک بووە لە ئەندامانی شاندی باڵای هەرێمی کوردستان بۆ دانوستاندن لەگەڵ بەغدا، باس لە بڕیاری ڕاگرتنی مووچەی فەرمانبەران لەلایەن دارایی عێراقەوە دەکات و دەڵێ پێچەوانەی یاسا و دەستووریشە.

وێنە گەورەکە: بڕیاری ڕاگرتنی 8 مووچەی ئەمساڵ لەلایەن وەزارەتی دارایی عێراق و محەممەد شیاع سوودانی، کاردانەوەی تووندی لە ناوخۆی کوردستان لێ کەوتووەتەوە، خەڵکی کوردستان و هەموو حیزب و لایەنە سیاسییەکان بە ئۆپۆزسیۆن و دەسەڵات و پارتی و یەکێتییەوە، گەیشتوونەتە ئەو باوەڕەی حکومەتی کوردستان لەسەر حەقە و هەموو پابەندی و ئەرکەکانی خۆی جێبەجێ کردووە، خەتای حکومەتی عێراقە مووچە نانێرێت و زووڵم لە خەڵکی کوردستان دەکات، بۆیە پێویستە هەڵوێستی تووندی بەرامبەر بگیرێتەبەر.

 

لێدوانی فەرمی: د. عەبدولحەکیم خەسرەو، سەرۆکی فەرمانگەی هەماهەنگی و بەدواداچوون لە ئەنجوومەنی وەزیرانی هەرێمی کوردستان بە ئاڤا میدیای ڕاگەیاند: ئەمەی وەزارەتی دارایی عێراق دەیکات پێچەوانەی دەستوور و یاسای بودجە و بڕیاری دادگەی فیدڕاڵیشە، ئەو نووسراوەی کە وەزارەتی دارایی عێراق کردوویەتی بۆ ڕاگرتنی مووچەی مووچەخۆرانی هەرێمی کوردستان هیچ بنەمایەکی  تێدا نییە.

- لە بڕیاری دادگەی فیدڕاڵیدا ئاماژە بە ئەوە دراوە کە نابێت بابەتی مووچەی مووچەخۆرانی عێراق و هەرێمی کوردستان تێکەڵ بە هیچ بابەتێک بکرێت، بەڵام وەزارەتی دارایی عێراق ڕێزی لەو بڕیارە نەگرتووە.

- بەپێی ماددەی 60ی یاسای بودجەی عێراق، ئەگەر تەخسیساتی داراییش نەمێنیت، دەسەڵات دراوەتە ئەنجوومەنی وەزیرانی عێراق کە پارە بۆ مووچەی فەرمانبەران، ئازووقە، کارەبا و چەند بوارێکی دیکە تەرخان بکات.

- ئەم هەڵوێستی وەزارەتی دارایی عێراق هەڵوێستێکی سیاسییە، چونکە هیچ بنەمایەکی یاسایی  و دەستووری نییە  و پێچەوانەی دەستووریشە

- هەمیشە دەسەڵاتدارانی عێراق هەڵوێستێکی نەرێنییان سەبارەت بە هاووڵاتیانی هەرێمی کوردستان هەبووە.